DENR, nakaalerto sa forest fire

Nakaalerto ngayon ang lahat ng regional office ng Department of Environment and Natural Resources (DENR) sa posibilidad ng forest fires sa inaasahang El Niño.

Binigyan ng direktiba ni DENR Secretary Roy Cimatu ang mga direktor ng 16 na DENR regional offices na magsagawa ng regionwide assessment at updating sa kani-kanilang forest protection plan bilang paghahanda sa pananalasa ng mahabang tagtuyot o El Niño, na maaaring magpataas sa posibilidad ng pagsiklab ng wild fire.

“Our teams should always be ready for deployment to suppress incidents of outbreaks, particularly grassfires, to prevent them from crossing over to forested areas and turn into full-blown forest fires,” ani Cimatu.

Pinatututukan ng DENR chief ang mga vulnerable site sa mga protektadong lugar at ang mga lugar na sumailalim sa rehabilitasyon ng Enhanced National Greening Program (ENGP).

Noong nakaraang taon, nagupgrade na ang DENR sa kakayahan nito sa pagresponde sa forest fire sa pamamagitan ng pagbili ng mas maraming fighting equipment, tulad ng mga fuel-powered grass cutter, collapsible fire pump, fire swatters, rake hoes, fire helmets, heat-resistant goggles, at iba pa.

Naglabas na rin si Cimatu ng administrative order para sa pagpapatupad ng national strategy for forest and biodiversity protection, gamit ang digital technology-based forest monitoring system na “Lawin Forest and Biodiversity Protection System.”