14 negosyo sa Caloocan at Bulacan, ikinandado

Ikinandado ng Bureau of Internal Revenue (BIR) ang walong business establishments sa Caloocan City at anim na pabrika sa Bulacan dahil sa umano’y iba’t ibang tax violations kabilang ang non-registration at under declaration of sales.

Tinukoy ni Caloocan Revenue District Officer Miguel Morada ang mga kumpanya na pawang matatagpuan sa Barangay Camarin at ito ay ang Genesis 215 Motorcycle Parts and Accessories, Avagen Drugs Store, CE Castillo Koreyan Eatery, F & M Salon, at ELJ Money Changers.

Ang dalawang iba pang retail outlets na pinatatakbo nina Jesus Ocampo Yeung at Francisco Matias ay ipinasara rin.

Ayon kay Bulacan Revenue District Officer Alfredo Santos, ang anim na pabrika sa loob ng compound sa Guiguinto ay ipinasara dahil sa umano’y non-registration.

Ito ay ang Lucky 999 Trading Resources, Cadmus Scienc Industries, Lebria Transport and Allied Services, Unicorn MPHolstery and General Merchandise, Zagro Corporation, at Inphilco Corporation.

Sinabi ni Caloocan Revenue Regional Director Manuel Mapoy, na may hurisdiksiyon sa buong Bulacan, na sa ilalim ng Section 105 ng Tax Code, ang mga pabrika ay kinakailangan ding iparehistro, gaya ng mga sangay, ng kanilang parent companies na matatagpuan sa ibang lugar.

Aniya, 14 na establisyemento ang mananatiling sarado hanggang sa maitama ang lahat ng tax deficiencies.