Mag-ayuno para sa mga bata —Tagle
Sa pagsisimula ng 40-araw ng Kuwaresma, hinikayat ng mga lider ng Simbahan ang bawat isa na makiisa sa maliliit na gawain ng pagkakawanggawa.
“We, Filipinos, have a deep relationship with our faith. The season of Lent is another opportunity for us to re-center our lives by helping those who are most in need,” pahayag ni Manila Archbishop Cardinal Luis Antonio Tagle.
Kabilang sa mga aktibidad na isinusulong ng Simbahan, lalo na sa panahon ngayon, ang Hapag-Asa Integrated Nutrition (Hapag-Asa) program. Aktibong nakikipagtulungan ang programa sa Simbahan upang mabawasan ang kagutuman at malnutrisyon sa mahigit dalawang milyong Pilipinong bata sa pamamagitan ng regular na pagdaraos ng mga feeding program sa pinakamahihirap at liblib na lugar sa bansa.
Upang maipagpatuloy ang misyon na matulungan ang mga bata, umaapela ang Hapag-Asa sa mga mananampalataya na mag-ayuno ngayong panahon upang maitulong ang pondong kanilang maitatabi mula dito para sa tinatawag na FAST2FEED.
Sa ilalim ng FAST2FEED initiative, ang P10 kada araw ay maaaring makapagpakain ng isang Manna Pack-based meal sa bata. Ang Manna Pack ay isang rice meal formula na may protina, Vitamin A, B, C, D, at calcium na inilalahok sa mga gulay na kalimitang ginagamit sa mga feeding programs.
Bukod sa feeding program, nagbibigay din ang Hapag-Asa ng skills at livelihood training para sa mga magulang at values education sessions para sa magulang at mga bata.