Narco list magiging ‘trial by publicity’ – Robredo
Tinutulan kahapon ni Vice President Leni Robredo ang paglabas ng listahan ng mga sinasabing narco politicians bago ang eleksiyon sa Mayo, sinabing dapat magsampa ng kaukulang kaso sa korte ang pamahalaan laban sa mga ito.
Nagbabala si Robredo laban sa “trial by publicity” sa harap ng kautusan ni Pangulong Rodrigo Duterte na ilabas ang listahan ng mga politiko na sangkot sa ilegal na droga.
“Siyempre, ayaw natin na magelect tayo sa public office ng mga narco politicians, pero kasuhan na sila ngayon. Iyon pala, may ebidensya laban sa kanila, bakit ayaw pang kasuhan? Bakit ita-trial by publicity?” aniya sa mga mamamahayag sa Nagcarlan, Laguna.
Idinagdag niya na: “Para warning din siya sa tao, pero hindi tayo nagiging unfair. Ito kasi, kapag trial by publicity, wala kang pagkakataon depensahan iyong sarili mo.”
Binanggit ni Robredo ang mga pagkakamali sa naunang drug list na naglalaman ng mga pangalan ng mga politiko, pulis , at hukom na inilabas ni Duterte sa nakalipas.
“Mahirap iyong trial by publicity, kasi ano iyong assurance natin na tama iyong information?” tanong ni Robredo.
Tinanong din si Robredo tungkol sa pahayag ni Presidential Spokesperson Salvador Panelo na ang wiretapped narco list information ay nagmula sa mga banyagang bansa.
“’Di ba bawal iyong wiretapping? Bawal sa batas natin iyon,” aniya. ILLEGAL WIRETAPPING Hindi rin kumbinsido si Senate President Vicente Sotto III na mga banyagang gobyerno ang nagbigay ng listahan ng mga politiko na diumano’y may kaugnayan sa droga.
“Malabo. Why will a foreign government wiretap politicians? A few, perhaps. But 82 [politicians]?” ani Sotto sa kanyang text message sa Balita kahapon.
Sinabi pa ni Sotto na dapat maalarma ang Pilipinas sa iniulat na wiretapping na isinagawa ng mga banyagang bansa.
“It’s because illegal wiretapping is not allowed here,” anang Senate chief. “If cases will be filed vs [these] politicians, it will be based on other evidences and not wiretaps.”
Sinabi naman ni Sen. Panfilo Lacson na dapat ay namuhunan ang Palasyo sa pangangalap ng legal evidence para patunayan ang narco list nito.
“Is the administration admitting to be complicit in the commission of a crime by foreign governments? Is it now a government policy to condone invasion of privacy of its own nationals by China, Israel, and the United States?” ani Lacson.
Ilalabas ng Department of Interior and Local Government ang mga pangalan ng sinasabing narco politicians sa susunod na linggo.
Sinasabing laman ng narco list ang 82 incumbent local officials, 64 sa kanila ay tumatakbo sa eleksiyon sa Mayo.