K to 12, palpak nga ba?

Nanawagan nitong Miyerkules si Senador Sherwin Gatchalian na repasuhin ang K to 12 basic education program ng bansa sa gitna ng bumababang performance ng mga estudyante matapos itong ipatupad.

“We have to review the K to 12 curriculum. We have to review rin kung yong tinuturo sa tech-voc sa ating K to 12 ay ‘yong kailangan ng mga industriya,” ani Gatchalian, namumuno sa pagdinig ng Senate education subcommittee kaugnay sa estado ng Philippine education system, nitong Miyerkules ng hapon.

Sa subcommittee hearing, binanggit ng senador ang mga pigura ng Department of Eucation (DepEd) na nagpapakita ng “low proficient” ng Grade 6 at Grade 10 students mula 2016 hanggang 2017.

“Honestly, ang over-all assessment ay hindi maganda dahil ang National Achievement Tests (NAT) natin ay naglalaro sa 40 percent lang for Grade 6 and Grade 10 at nakita pababa siya nga pababa so this quite alarming,” ani Gatchalian, idiniin na ang proficiency rates sa mga nakalipas na taon ay nasa 60 porsiyento.

Bukod sa low proficiency rates ng K to 12 students, naobserbahan din ni Gatchalian ang “misalignment” ng programa at ng mga kailangan sa mga industriya para sa trabaho.

“Dahil yong curriculum ngayon na kailangan sa K to 12 hindi naman tinuturo sa kolehiyo,” paliwanag niya.

Inamin naman ni DepEd Assistant Secretary Alma Rubitorio sa pagdinig na marami pa ang kailangang gawin at dapat ayusin sa K to 12 program.