Killer ni Sytin, timbog; utol, utak?

Arestado na ang pangunahing suspek sa pagpatay sa negosyanteng si Dominic Sytin sa Zambales, noong nakaraang taon.

Iniharap ngayong Lunes ng umaga sa Camp Crame ni Philippine National Police (PNP) Chief Director General Oscar Albayalde sa mga mamamahayag ang suspek sa pamamaslang kay Sytin sa Subic Bay Freeport noong Nobyembre 28, 2018.

Ayon kay Chief Supt. Amador Corpus, hepe ng Criminal Investigation and Detection Group (CIDG), si Edgardo Luib, alyas “Inject”, ay dinakip sa tinutuluyan nito sa Batangas nitong Marso 5, sa bisa ng arrest warrant para sa kasong murder.

Itinuro ni Luib ang isang Ryan Rementilla na umano’y nag-recruit sa kanya para ipapatay si Sytin.

Sinabi ng CIDG na itinuturo rin ang umano’y nakababatang kapatid ng biktima na si Dennis Sytin na nag-utos umano upang ipapatay ang negosyante.

Sinasabing away sa negosyo ng magkapatid ang motibo sa pagpatay kay Dominic.

“From all indications, this highprofile murder of Dominic Lim Sytin was apparently motivated by rivalry among corporate siblings and carried out through a gun-for-hire contract with a hitman,” sabi ni Albayalde.

Sa harap ng kanyang pamilya at abogado, sinabi ni Albayalde na inamin ni Luib ang krimen at pinangalanan si Dennis bilang utak sa krimen.

Ayon kay Luib, nakilala niya si Dennis sa pamamagitan ng kababata niyang si Ryan Rementilla, at sa una nilang paghaharap noong Agosto sa isang beach resort sa Subic ay inabutan siya ng P10,000.

Binigyan pa umano si Luib ng P10,000 sa ikalawang paghaharap nila, at dalawang araw bago ang pagpatay, sinabi ni Corpus na binigyan pa si Luib ng P30,000.

“The total contract price was P1 million but according to him, he only received a total of P50,000,” ani Corpus.

Matatandaang nasugatan din ang security aide ng biktima na si Efren Espertero nang barilin ito ni Luib nang malapitan sa ulo sa Lighthouse Marina Resort sa Subic.

Si Sytin ang founder at chief executive officer ng United Auctioneers, Inc., at isa rin sa mga may-ari sa ACEA Subic Bay resort.

Nakuha umano mula sa suspek ang isang carbine rifle, isang .45 caliber pistol, isang .40 caliber Glock pistol, at isang malaking sachet ng marijuana.

Bukod sa murder, kinasuhan na rin si Luib ng paglabag sa Comprehensive Dangerous Drugs Act at illegal possession of firearms.

Sa pag-iimbestiga kay Luib, natukoy pa ng pulisya na mayroon itong dalawang arrest warrant sa murder, ang isa ay para sa pagpatay sa mamamahayag na si Mae Magsino noong Abril 2015.