Debate, mabuti para sa botante

Sinabi ng isang lider ng Kamara na ang public debates sa panahon ng eleksiyon ay maaaring maging doubleedged sword para sa ilang kandidato.

Ayon kay Antipolo 2nd district Rep. Romeo Acop, ang mga debate ay maaaring kapwa makabuti at makasama sa mga kandidato, depende sa kanilang performance sa mga tagisan ng talino at galing sa pananalita.

“For the candidates, it would serve as a forum to increase the awareness about them of the voters and to showcase their capabilities and other reasons why they should be elected,” ani Acop, namumuno sa House Committee on Public Order and Safety.

“However, it could also show the inadequacies of the candidates,” idinagdag ng mambabatas, tinukoy na halimbawa ang ilang kandidato na maaaring magkalat o magkamali sa kanilang mga sagot sa debate.

Ngunit ayon kay Acop, ang mga botante ang higit na makikinabang sa mga debate dahil mas makikilatis nila ang mga kandidatong kanilang iboboto.

“On the part of the electorate, they would be able to know the candidates and determine whether they are capable and appropriate for the position,” aniya.

Hinimok naman kahapon ng nakakulong na si Senador Leila de Lima ang Commission on Elections (Comelec) na muling pag-isipan ang desisyon nitong huwag nang mag-organisa ng mga debate para sa senatorial candidates na tumatakbo sa May 2019 midterm polls.

Ipinunto ni De Lima na bilang isang constitutional body na inatasang magdaos ng malinis at tapat na halalan, isa sa mga obligasyon ng Comelec ay tiyaking wellinformed ang mga botante bago sila bumoto sa Election Day.

Sinabi ni De Lima na ang organized debate ay isa sa pinakamainam na paraan upang maipakita ng mga kandidato ang kanilang kahandaan sa public office, at para matimbang ng mga botante ang qualifications ng mga ito para sa posisyong kanilang tinatakbuhan.

“Surely, something as essential as organizing senatorial debates is not beyond Comelec’s capabilities. In the end, it comes down to the question of how important organized senatorial debates are to the Comelec in the fulfillment of its mandate of educating the voters,” diin niya.