Senado at Kamara, nagbudget meeting
Ipinatawag ni Pangulong Rodrigo Duterte ang mga lider ng Kongreso para maresolba ang impasse sa pagitan ng Senado at Kamara kaugnay sa P3.757trilyon panukalang 2019 budget.
Sinabi ni Senate President Vicente Sotto III kahapon na mismong ang Punong Ehekutibo ang nagpatawag sa pagpupulong.
“Pinatawag na ako ng Presidente mamayang gabi,” ani Sotto sa panayam sa radyo kahapon ng umaga.
Sasamahan si Sotto nina Senate President Pro Tempore Ralph Recto, Majority Leader Juan Miguel Zubiri, finance committee chair Sen. Loren Legarda, and Sens. Panfilo Lacson at Gregorio Honasan.
Makakaharap nila si House Speaker Gloria Macapagal Arroyo at appropriations committee chair Rep. Rolando Andaya Jr. na inimbitahan din sa dinner sa Palasyo.
Nilinaw naman ng Palasyo na walang intensiyon si Pangulong Duterte na diktahan ang mga mambabatas na ipinatawag nito kagabi para sa isang hapunan sa Malacañang.
Sa press briefing kahapon ng tanghali, sinabi ni Presidential Spokesman Atty. Salvador Panelo na nagsilbi lamang moderator ang Pangulo sa pag-uusap para maplantsa ang gusot ng mga senador at kongresista sa 2019 national budget.
Kinumpirma ng lider ng Senado nitong Lunes ng gabi na natanggap na ng Mataas na Kapulungan ang pinal na kopya ng 2019 General Appropriations Bill na nilagdan ni Arroyo.
Sinabi ni Sotto na hindi niya lalagdaan ang GAB kapag natuklasan nila na talagang ni-realign ng Kamara ang P79-bilyon sa measure matapos ang ratipikasyon nito, na idiniin niyang labag sa konstitusyon.
Ikinalugod din niya ang pahayag ni Pangulong Duterte na hindi nito lalagdaan ang “illegal” budget.
Sinabi naman ni House Senior Deputy Minority Leader Anthony Bravo na ang mamamayang Pilipino ang magdurusa sa pagkaantala ng GAB.
“This Budget is very much needed by our people. Sino ho ang tatamaan dito? Iyong ating mahihirap na kababayan. So I’m appealing to the Senate. Let the President exercise his discretion for the veto power,” ani Bravo.