Ebidensiya ng prosekusyon, minaliit ni Purisima

Umaasa si dating Philippine National Police (PNP) chief director Alan Purisima na ibabasura ng Sandiganbayan Second Division ang mga kasong perjury laban sa kanya dahil sa hindi sapat na ebidensiya.

Sinampahan siya ng walong kaso ng paglabag sa Article 183 ng Revised Penal Code dahil sa kabiguang ideklara ang mga ari-arian ng kanyang misis na si Maria Ramona Lydia Purisima, sa kanyang Statement of Assets Liabilities and Net Worth (SALN) para sa mga taong 2006 hanggang 2009, gayundin sa 2011 hanggang 2014.

Nitong Marso 4, naghain siya ng motion for leave to file demurrer to evidence at to admit attached demurrer to evidence. Ang demurrer to evidence ay isang pagkontra sa hindi sapat na ebidensiya ng prosekusyon. Kapag pinaboran ito ng korte, maibabasura ang kaso laban sa kanya.

Sa kanyang mosyon, sinabi ni Purisima na hindi niya layuning iantala ang proceedings, kundi ito ay pagkuwestiyon sa testimonial at documentary evidence ng prosekusyon. Naniniwala siya na nabigo itong i-establisa ang mga elemento ng perjury, at hindi mapatutunayan na siya ay nagkasala beyond reasonable doubt.

Binanggit niya sa kanyang demurrer na malinaw na wala ang third element ng perjury – na inaakusahan siya ng willful at deliberate assertion of falsehood.

Ikinatwiran ni Purisima na wala sa mga saksi ng prosekusyon ang personal na nakakakilala sa kanya o sa kanyang pamilya, kaya’t wala silang personal knowledge sa paghahanda ng kanyang SALNs o ng mga nilalaman nito.

Sinabi rin ni Purisima na nabigo ang prosekusyon na mag-isyu ng subpoena para makakuha ng mga kopya ng kanyang SALNs na inihain sa Office of the President. Resulta nito, wala silang hawak na sapat na ebidensiya.

Hindi pa naglalabas ang anti-graft court ng resolusyon na magtutukoy kung pagbibigyan nito ang mosyon ni Purisima at tatanggapin ang kalakip na demurrer.