Calamity fund sa mangingisda, magsasaka, giit
Hiniling ng isang grupo ng mangingisda at magsasaka sa Department of Agriculture (DA) at Bureau of Fisheries and Aquatic Resources (BFAR) na magkaloob ng tulong sa kanila ngayong labis silang naaapektuhan ng El Niño.
Ayon kay Pambansang Lakas ng Kilusang Mamalakaya ng Pilipinas (PAMALAKAYA) National Chairman Fernando Hicap, dapat ipamahagi ang calamity fund ng pamahalaan sa mga mangingisda at magsasaka, na “frontline casualties” tuwing tagtuyot.
Sa isang pahayag, sinabi ng PAMALAKAYA na ang nahuhuli ng maliliit na mangingisda ay bumaba; mula sa pito hanggang sampung kilo ay naging tatlong kilo kada palaot na lang ang naiaahon nila.
Ayon kay Ronnel Arambulo, PAMALAKAYA-Laguna de Bay coordinator, na ang presyo ng mga isda sa Laguna de Bay ay nasa “all-time low” dahil sa mas mababang kalidad dulot ng matinding init ng panahon.
Ang presyo ng tilapia ay bumaba ng 40 porsiyento, mula sa dating P50 kada kilo ay naging P20 kada kilo. Samantala, ang bangus ay P50 kada kilo, na 71% mas mababa kumpara sa P70 kada kilo.
Samantala, hiniling din ng na Kilusang Magbubukid ng Pilipinas (KMP) sa gobyerno na magkaloob ng tulong sa mga magsasakang apektado ng tagtuyot.
Ayon kay Danilo Ramos, KMP chairman, maaaring gamitin ng pamahalaan ang calamity at quick response fund.
“Marami ang walang kita at malulugi ngayong anihan dahil mababa o walang ani dahil sa tagtuyot,” sabi ni Ramos. “DA’s cloud seeding and solar irrigation activities are good but not enough. Farmers need actual and immediate relief.”