Water crisis probe, sisimulan ngayon

Inaasahang dadalo ang mga pangunahing opisyal ng Manila Water, Maynilad, water regulators at limang Metro Manila mayors sa joint House panel probe ngayong Lunes hinggil sa kakapusan sa tubig sa Metro Manila at Rizal.

Magsasagawa ng hearing, bandang 7:00 ng umaga ngayong Lunes, ang House Committee on Metro Manila Development, sa pamumuno ni Quezon City Rep. Winston “Winnie” Castelo, at ang House Committee on Housing and Urban Development, sa pamumuno ni Negros Occidental Rep. Albee Benitez, kaugnay ng water shortage sa ilang bahagi ng Metro Manila at Rizal.

“We need to get a clear picture of the situation and how we’re going to deal with it because a lot of people are already getting adversely affected by the problem,” ani Castelo.

“We will need explanations from the concessionaires, regulators, and the experts why we got into this mess and their suggestion on how we can get out of it,” dagdag niya.

Umaasa si Castelo na dadalo ang lahat ng inimbitahan upang sila ay “collectively come up with the right approach to overcome the water crisis.”

Sa kanyang parte, sinabi ni Benitez na, “We have to look into the water shortage with dispatch and assure the people that the government is addressing the problem with assurance that it would not happen again.”

Iniugnay ni Puwersa ng Bayaning Atleta (PBA) party-list Rep. Jericho Nograles ang water shortage sa Metro Manila sa maling pamamahala ng Manila Water.

Inaasahang dadalo sa hearing sina Quezon City Mayor Herbert Bautista, Pasig City Mayor Roberto Eusebio, Navotas City Mayor John Reynald Tiangco, Muntinlupa City Mayor Jaime Fresnedi, at Caloocan City Mayor Oscar Malapitan.

Dadalo rin daw sina Manila Water CEO Ferdinand dela Cruz, Maynilad Water Services President-CEO Ramoncito Fernandez, Local Water Utilities Administration (LWUA) Administrator Jeci Lapus, LWUA Chairman Rogelio Uy, Metropolitan Waterworks and Sewerage System (MWSS) Administrator Reynaldo Velasco, MWSS Regulatory Office Chief Patrick Ty, at National Water Resources Board Executive Director Servillo David.

Kahapon, nagsimula na rin ang pananalangin ng Simbahang Katoliko ng “oratio imperata” kaugnay ng water shortage.

Ang oratio imperata ay dinasal sa mga misa kahapon, at isinahimpapawid sa PTV-4.