Ebidensiya vs iba pang narco-pols, kinakalap
Patuloy sa pangangalap ng ebidensiya ang mga awtoridad upang mapatunayang sangkot sa illegal drugs trade ang ilang pulitiko sa Pilipinas.
Ayon kay Senior Supt. Bernard Banac, tagapagsalita ng Philippine National Police (PNP), patuloy na nakikipag-ugnayan ang pulisya sa Philippine Drug Enforcement Agency (PDEA) para sa mga saksi at ebidensiya upang matulungan ang pamahalaan na idiretso sa korte ang mga narcopoliticians.
“The PNP and PDEA are working together in monitoring elected officials who are believed to be involved in illegal drugs activities. We continue to gather pieces of evidence and information and validation of reports that we would receive,” ayon kay Banac.
Una rito, tinukoy ni Pangulong Duterte ang 46 na local politicians na iniuugnay niya sa illegal drugs trade. Kabilang sa listahan ang tatlong kongresista, isang provincial board member, 35 alkalde, at pitong bise alkalde.
Sa inisyal na ulat, gumamit ng modern surveillance equipment ang pamahalaan sa pagberipika sa mga pulitikong sangkot sa droga, ngunit binawi ito ng Malacañang.
Sinabi ni Banac na maraming local politicians, na karamihan ay reelectionist ngunit may ilan na piniling hindi kumandidato sa Mayo, ang nasa inisyal na listahan.
“But because of the validation, the number was reduced to 46,” ani Banac.
Gayunman, sinabi niya na patuloy nilang inaalam ang koneksiyon ng mga hindi pinangalanan ng Pangulo.
“This is only the partial list of narco-politicians. Others are still being revalidated while there are some, who were transferred to civilian list, since they are no longer holding or running for public office,” pahayag ni PDEA spokesman Derrick Carreon.
“The names of politicians that were not announced are subject for continuous validation and case build-up by the intelligence agencies of the government,” dagdag niya.