James Gunn, balik sa ‘Guardians of the Galaxy 3’
NEW YORK (AP) — Makalipas ang ilang buwan matapos masibak dahil sa mga luma niyang tweets, rehired si James Gunn bilang direktor ng Guardians of the Galaxy Vol. 3.
Nitong Biyernes, kinumpirma ng mga kinatawan ng Walt Disney Co. at ni James na ibinalik na siya bilang writer-director ng Marvel franchise, na dati na niyang ginawa.
Hulyo nang nakaraang taon nang sinibak ang direktor matapos muling lumutang ang dekada nang nakalipas na mga tweet niya tungkol sa pedophilia at rape.
Una nang humingi ng tawad si James sa kanyang mga naging tweet, na tinawag niyang “unfortunate efforts to be provocative”. Sa panahong iyon, sinabi ni Disney Chairman Alan
Horn na taliwas ang mga naging pananalita ni James sa values ng kumpanya.
Taong 2008 hanggang 2011 pa ang nasabing tweets, na muling binuhay ng mga far-right propagandists na sina Mike Cernovich at
Jack Posobiec, na sumuyod sa social media history ng direktor matapos nitong batikusin si President
Donald Trump.
Gayunman, mariing tinutulan ng marami ang pagkakatanggal kay James,
at bumuo pa ang mga fans ng isang petition online. Nagpahayag din ng suporta kay James ang cast ng Guardians, kabilang sina Chris Pratt, Bradley Cooper,
Zoe Saldana, Vin Diesel at iba pa sa pamamagitan ng isang open letter. “Although I don’t support James Gunn’s inappropriate jokes from years ago, he is a good man,” pahayag ni Chris.
“I am tremendously grateful to every person out there who has supported me over the last few months,” tugon naman ni James sa mga sumuporta sa kanya. “I am always learning and will continue to work at being the best human being I can be.”
Nagpasalamat din si James sa Disney at sinabing “[he was excited to] continue making films that investigate the ties of love that bind us all.”
Nakatakda ring isulat at idirehe ni James ang susunod na instalment ng Suicide Squad ng Warner Bros. para sa Marvel, na karibal ng DC Comics. Inaasahang ilalabas ang pelikula sa Agosto 2021. Samantala, tumanggi namang magbigay ng komento ang Disney spokesman hinggil sa kung kailan sisimulan ang produksiyon ng Guardians 3.