Suspek sa Silawan killing, pinalaya
CEBU CITY – Pinalaya na ng pulisya ang binatilyong suspek sa brutal na pamamaslang sa 16-anyos na si Christine Lee Silawan habang inililibing ang dalagita nitong Sabado.
Paglilinaw ni Atty. Vincent Isles, abogado ng 17-anyos na suspek, pinakawalan ng Lapu-Lapu City Police ang suspek matapos niyang kuwestiyunin ang legalidad ng pagaresto sa binatilyo.
Sinabi ni Isles na matapos niyang sunduin sa presinto ang suspek nitong Sabado ng hapon ay kaagad niya itong idiniretso sa isang safe house.
“Last Thursday, we filed an omnibus motion to release the boy from the custody of the homecare facility of the social welfare office because there is no valid ground for him to be held under the custody of the law,” paglilinaw ni Isles.
Ang suspek ay dinakip ng nga tauhan ng National Bureau of Investigation (NBI)-Region 7 sa bahay nito sa Barangay Maribago sa lungsod nitong Marso 16 at kinasuhan ng murder.
Ayon sa abogado, hindi na maaaring maipatupad ang warrantless arrest dahil lagpas na sa limang araw ang nakalipas nang mangyari ang krimen.
Kaugnay nito, puno naman ng emosyon ang paglilibing kay Silawan sa Cattleya Cemetery sa Cordova, Cebu nitong Sabado.
Dismayado naman si Presidential Anti-Corruption Commission (PACC) Chairman Dante Jimenez sa pagpapalaya sa suspek at sinabing maraming “butas” ang isinagawang imbestigasyon sa kaso.