Ang Flores de Mayo at Santakrusan
MATAPOS ang Flores de Mayo, susunod ang Santakrusan. Ito’y prusisyon sa Banal na Krus, na layuning gunitain at bigyan ng pagpapahalaga ang pagkakatagpo sa Krus sa Kalbaryo ni Reyna Elena, ina ng batang Hari na si Constantino.
Ayon sa kasaysayan, noong taong 326, naglakbay si Reyna Elena sa Jerusalem at tatlong krus. Isa sa mga krus ang may mapaghimalang kapangyarihan, at pinaniwalaan ni Reyna Elena na iyon ang pinagpakuan at kinamatayan ni Kristo sa Kalbaryo matapos na Siya’y dakpin, parusahan at ipako sa krus ng mga Hudyo hanggang sa mamatay. Ngunit makalipas ang tatlong araw, si Kristo’y muling nabuhay. Ang unang nakabatid nito ay si Maria Magdalena, na siyang nagbalita sa mga alagad ni Kristo.
Ang kapistahan ng Sta. Cruz ay itinakda ng Simbahan na ipagdiwang tuwing ika-3 ng Mayo. Ang pagdiriwang ay bilang
pagpapahalaga sa pagkakatagpo sa Banal na Krus ni Reyna Elena.
Ang pista ng Sta. Cruz ay nagsimula pa noong kapanahunan ng mga unang Simbahang Kristiyano. Dinala at ipinakilala sa Pilipinas ng mga misyonerong Kastila. Ginamit sa pagpapalaganap ng Ebanghelyo na bahagi na ng kanilang pagmimisyon sa iba’t ibang lugar sa Pilipinas. Bunga nito, ang Sta. Cruz ay naging patron at pangalan ng maraming bayan, lungsod at barangay. Mababanggit na mga halibawa ang Sta. Cruz, Laguna; Sta Cruz, Maynila, Sta.Cruz, Marinduque, Sta. Cruz, Ilocos Sur, at Barangay Sta. Cruz sa Antipolo, Rizal.
Ang Santakrusan ay idinaraos sa mga pangunahing lansangan sa bayan na karaniwang nagsisimula sa harap ng simbahan o kapilya. Nagwawakas sa tapat ng bahay ng napiling Reyna Elena, na roon ay may inihandang pagkain para sa mga lumahok at sumama sa Santakrusan.
Tampok sa Santrakrusan ang isang napiling dalaga na kinoronahan bilang Reyna Elena. Umaawit ang mga kasama sa prusisyon at iba pang umiilaw ng “Dios te salve, salve Maria, llena eres de Gracia, El Senores,. Senores contigo,bendita tu eres, entre todas las Mujeres, ebendito es el fruto, de tu vientre Jesus”. Ang nabanggit ay dasal sa Kastila sa Mahal na Birhen na ang salin sa Pilipmo ay “Aba Ginoong Maria, napupuno ka ng grasya .... Kung walang umaawit ay tinutugtog naman sa prusisyon ng isang banda ng musiko.
Nasa hulihan ng Reyna Elena (katabi ang kanyang Constantino) ang karosa na naroon ang imahen ng Mahal na Birhen. Maliwanang ang mga ilaw at may palamuti ang karosa.
Kasama sa Santakrusan ang iba pang sagala, katulad ng Rosa Mistica, Reyna de las Estrellas, Reyna del Cielo, Reyna Paz, Reyna de los Virgines at Reyna de las Flores.
Sa prusisyon, nasa unahan ang mga sundalo at si Matusalem. Kasunod ang Reyna Banderada, na may hawk na dilaw na bandila na sagisag ng pagdating ng Kristiyanismo sa Pilipinas.
Kasama at mga tauhan ng Santrakrusan ang Reyna Fe, na may hawak na krus ng pananampalataya; Reyna Esperanza, na may hawak na angkla.; Reyna Caridad, na may hawak na Puso; Reyna Abogada, ang tagapagtanggol ng mahihirap at inaapi; Reyna Sentanciadia, na kumakatawan sa mga walang sala; at Reyna Justicia, na may hawak na timbangan ng katarungan.
May mga batang babae rin sa Santakrusan, na may hawak natig-iisang letra na kapag binasa ay AVE MARIA.
Sa paglipas ng panahon, nagkaroon ng pagbabago ang Santakrusan. Ang mga orihinal na mga tauhan nina Reyna Elena, Haring Constantino at iba pang sagala ay nakasama sa agos ng mga pagbabago. Nahaluan at nabalutan ng materyalismo. Ang mgs sagala sa Santakrusan ay mga beauty queen, mga artista sa pelikula at telebisyon. Tinitilian sila ng kanilang mga fans kapag kumakaway at ngumingiti.