Carpio-Morales, hinarang sa HK airport
HINARANG sa Hong Kong International Airport si exOmbudsman Conchita Carpio-Morales at pamilya para magbakasyon doon noong Martes. Naniniwala ang Ombudswoman na may “balls” na hindi siya pinayagang makapasok sa Hong Kong dahil sa reklamo na isinampa niya at ni ex-Foreign Sec. Albert del Rosario laban kay Chinese Pres. Xi Jinping sa International Criminal Court (ICC).
Inireklamo nina Carpio-Morales at Del Rosario ang pangulo ng dambuhalang bansa sa ICC dahil umano sa nagawang mga krimen sa kapaligiran (environmental crimes) sa South China Sea/West Philippine Sea. Batay sa mga ulat, hinarang siya sa HK airport ng immigration officials dahil siya umano ay “security threat.” Ano bang dahilan at katwiran ito?
Sinabi ng mga opisyal ng HK airport na ang pagharang at pagbabawal na
makapasok sa HK ng matapang na exOmbudsman ay pagtalima umano sa utos ng isang source na ayaw nilang tukuyin. Ang source ba ay ang pangulo ng China o ng Chinese Foreign Affairs Secretary?
Sa loob ng apat na oras, ayon sa report, hiniwalay si Carpio-Morales sa kanyang pamilya at idinetine nang apat na oras at pinagtatanong. Pinayagan din umanong makapasok siya sa HK at pamilya, pero ipinasiya ni Carpio-Morales na bumalik na lang sa Pilipinas.
Ganyan ang katotohanan sa buhay. Hari at panginoon ang mayaman at makapangyarihan. Mayaman, mapuwersa at makapangyarihan ang China kumpara sa Pilipinas na isang sisiw, hirap sa kabuhayan, mahina ang Armed Forces at police forces kaya takot na takot bumangga ang lider nito sa dragong nasyon ni Xi Jinping.
Pagkalapag sa NAIA ng eroplano na sinakyan niya pabalik sa ‘Pinas noong Martes dakong 8:57 ng gabi, sinabi ni Carpio-Morales sa mga reporter na walang ibinigay na dahilan o katwiran ang HK immigration officials kung bakit siya hinarang sa loob ng apat na oras at itinuring na isang “security threat.”
Si Carpio-Morales ay tiyahin ni lawyer Mans Carpio, ginoo ni Davao City Mayor Sara Duterte. Samakatuwid, balae siya ni Pres. Rodrigo Roa Duterte. Nais magtanong ng mga Pinoy kina PRRD, Mans Carpio, at Inday Sara tungkol sa kanilang opinyon sa insidenteng ito. ‘Di ba kahit sinong mamamayan sa mundo ay may karapatang magbiyahe (right to travel)? Dapat ay ibinigay ng HK immigration ang dahilan kung bakit siya hinarang at hindi pinapasok sa dating British Crown Colony.
Ipinasiya ni Sen. Francis “Kiko” Pangilinan na magbitiw noong Martes bilang pangulo ng Liberal Party (LP), bunsod ng pagkatalo ng mga kandidato ng Otso Diretso sa nakaraang halalan. Inaako ni Sen. Kiko ang buong responsibilidad sa pagkatalo ng Otso Diretso senatorial bets laban sa mga kandidato ng Hugpong ng Pagbabago at PDP-Laban.
Tinanggihan ni Vice Pres. Leni Robredo, LP chairwoman, ang pagbibitiw ni Kiko, pati na ang resignation ni Quezon City Rep. Christopher Belmonte, ang LP Secretary General. Ayon sa mga pinuno at miyembro ng LP, ang desisyon ni Pangilinan na magbitiw ay tanda ng kapakumbabaan at hindi dahil sa pagkatalo ng oposisyon. Siya ang tumayong campaign manager ng LP at Otso Diretso.
Walang sakit ang ating Pangulo katulad ng mga espekulasyon dahil sa hindi niya paglitaw sa publiko sapul nang bumoto noong Mayo 13 sa Davao City. Bilang patunay na si PDu30 ay “well, alive and kicking”, ipinakita sa larawan ng isang broadsheet ang Pangulo na nakikipagkamay kay Thai Ambassador Vasin Ruangprateepsaeng matapos na tanggapin ang credentials sa Malacañang.
Sinampahan ng mga reklamong dishonesty ang mga opisyal ng Comelec at ang automated election provider nito na Smartmatic sa Ombudsman dahil umano sa pagkabigo na ipatupad ang mga probisyon ng automated election system. Sana ay lumitaw ang katotohanan at hindi magduda ang taumbayan na naging kasabwat ang Comelec sa umano’y dayaan sa nakarang eleksiyon na, ayon sa isang TV broadcaster na may “dry humor”, ay na-Zero Diretso ang Otso Diretso!