QC, sumungkit ng playoff sa M-League
Mga Laro Ngayon (Bacoor Strike Gym, Cavite) 10:30 a.m. – Pasay vs Makati (17U) 1:00 p.m. – Las Piñas vs Parañaque (17U)
2:30 p.m. – Bacoor vs Taguig (17U) 4:30 p.m. – Pasig vs Caloocan (Reinforced) 6:00 p.m. – Bacoor vs Marikina (Reinforced)
NAKAMIT ng Quezon City ang inaasam na playoff berth matapos padapain ang Pateros-Metro Asia 100-86 nitong Huwebes ng gabi sa Metro League Reinforced (Second) Conference sa San Andres Sports Complex sa Manila.
Solido ang naging simula ng Junior Capitals na maagang umagwat ng 16puntos, 22-6, hanggang sa nagtuluytuloy sa blowout na panalo na nag-angat sa kanila sa markang 5-2.
Dahil dito, naselyuhan din ng QC ang isang semifinal spot sa North Division ng ligang ito na suportado ng Metro Manila Development Authority (MMDA), Philippine Basketball Association (PBA) at Barangay 143.
Nagwagi rin ang Valenzuela-San Marino, 77-52 kontra Manila-INGCO.
Nagtala si John Carl Melegrito ng game-high 22 puntos kasunod si Ibrahim Ouattara at JJ Española na may 15 at 13 puntos, ayon sa pagkakasunod upang pamunuan ang nasabing panalo ng Quezon City.
Namuno naman para sa Pateros si Alexander James Asis na may 17 puntos.
Tuluyan namang nalaglag sa kontensiyon ang Pateros sa pagbaba
nito sa barahang 1-7 sa South Division ng liga na itinataguyod ng Synergy 88, World Balance, Excellent Noodles at San Miguel Corporation.
Tumapos namang may 14 puntos si Reneford Ruaya upang pangunahan ang reigning All Filipino Conference champion Valenzuela sa pag-akyat sa markang 4-3 sa North Division nitong liga na suportado din ng SMS Global Technologies, Inc. bilang official livestream and technology partner, Spalding bilang official ball, Team Rebel Sports bilang official outfitter, PLDT bilang official internet service provider at Manila Bulletin bilang media partner.
Namuno naman si ex-PBA player Ronnie Matias para sa Manila na bumagsak sa 3-5 na kartada sa itinala nitong 13 puntos.