‘Unbreakable,’ finest performance nina Bea at Angelica
LAHAT tayo may mga kaibigan, at siyempre may best friend. Kaibigan ang pamilyang napipili.
At ang isang tapat na kaibigan nga raw sabi ng isang pantas ay katumbas ng sandaang kamag-anak. Pero kung bakit naman ganoon, na ang pinakamamahal na kaibigan pa mismo ang nakakapanakit sa atin nang husto. Friendship movie ang Unbreakable, comeback project ni May Cruz Alviar na kagagaling sa two-year hiatus. Ramdam sa final product na iningatan ang pagkakasulat sa script at sincerely made ang pelikula.
Sa trailer pa lang, nag-mental note na kami na hindi namin ito palalampasin sa regular showing. Pero nang mabasa ko sa post last Tuesday na Graded A sa Cinema Evaluation Board, bigla akong naglambing ng premiere ticket kay Mico del Rosario, PR head ng Star Cinema. Compelling story of friendship ang Unbreakable.
Ito lang ang premiere night na nakakabingi ang katahimikan ng mga nanonood.
Ang pelikula’y para ring musika o painting (sa katunayan pinaghalong audio-visual arts), kung nakakalikha ka ng katahimikan sa pagmumunimuni ng mga nakikinig o art enthusiast na tumitingin, highly successful ka. Na-achieve ito ng Unbreakable.
Ito ang pinakamahusay na pelikula ni May Cruz Alviar at ang finest performance nina Bea Alonzo at Angelica Panganiban sa dalawang characters na tiyak na magtatagal sa alaala ng mga manonood. Nagsimula ang istorya noong 2006.
Pinagtagpo ng kanyakanyang kabiguan sa buhay sina Mariel (Bea) at Deena (Angelica), nakita ng una na mag-isang nakikipagrambulan sa grupo ng ilang babae ang huli. Ang pinagaawayan, lalaking wala naman sa eksena. Walang kakampi, naawa si Mariel kaya nakisali sa bakbakan. “Thank you, my hero,” sey ni Deena.
Bagamat schoolmates, iyon ang unang encounter nila. Scholar type si Mariel, peteks lang na palipat-lipat sa kurso at boyfriends si Deena.
Tipong kaladkarin at sa katunayan at siya pa nga ang nangangaladkad ng lalaki. Agad naipakita sa sumunod na mga eksena na dysfuntional ang pamilya ni Mariel, na umuuwi lang ang tatay ‘pag sawa na sa kerida.
Ulila na sa ama at nasa Norway naman ang mama ni Deena, may iba nang pamilya at feeling niya hindi na siya pinahahalagahan.
Weak ang personality ni Deena, at nakatagpo siya ng “mamee” sa serious type at caring na si Mariel.
Sincere ang storytelling pero may mga eksena ring riot sa katatawanan, tulad noong alarmado si Deena sa cancer sa boobs niya na pilit ipinapakapa kay Mariel.
Nakapa raw kasi ng bagong boyfriend na may bukol. ‘Yon pala’y ribs lang naman na napagkamalang bukol, sabi ng doktor. At dahil false alarm naman, magpa-pregnancy test na lang daw siya ayon kay Deena.
Napakasayang eksena pero planting o foreshadowing ito na aanihin sa hulihan ng pelikula.
Dahil nga hinog na hinog ang pagkakagawa. Pati na ang pagsali nila sa costume contest na naging dalawang malaking boobs sila, fundraising nila, na nakalikom sila ng P10,000, dahil sinaid ng tatay ni Mariel at ng kabit nito ang joint savings account ng parents niya. Foreshadowing din sa mga magaganap pa lamang sa huling bahagi ng buhay nila na ang type ng crush ni Mariel ay si Deena.
Siya ang gusto nitong isayaw pero tinanggihan ni Deenam. “Walang makakasira sa atin,” pangako nila sa isa’t isa. Pero nasira ang friendship nila.
Una, 2009, habang nasa trabaho si Mariel ay nasa parking area naman si Deena, lasing, nangungulit na samahan. Naging clingy na si Deena at ubos na ang pasensiya sa kanya ni Mariel. Nagkasumbatan sila sa attitude nila sa buhay at sa trabaho, at nagkasamaan ng loob. Nagtungo sa Norway at naging caregiver si Deena.
Pangalawang pagkakasira, sa lalaki na at nang tuluyan na silang naging magkapamilya. Magkapatid ang napangasawa nila na ginagampanan nina Richard Gutierrez at Ian Veneracion. Mother in law nila si Gloria Diaz na bipolar yata kasi magkaibang personality ang inihaharap kina Mariel at Deena.
Hindi masyadong pronounced as love triangle ang pelikula at hindi na rin namin idedetalye ang napakaraming highlights para hindi kami maging spoiler. Highly recommended namin ang Unbreakable.
Bihirang makagawa ng ganitong pelikula kaya hindi dapat palampasin. Garantisadong magugustuhan ito ng marami dahil sino ba sa atin ang hindi nagpahalaga at nagmahal sa totoong kaibigan?