May mananagot sa SEAG mess

DIGONG ‘DI MASAYA

May mananagot kapag napatunayan sa mga imbestigasyon ang corruption at incompetence sa pagho-host ng bansa sa 30th Southeast Asian Games sa bansa, tiniyak ng Malacañang sa publiko kahapon.

Sa gitna ng mga kapalpakan sa pagiging punong abala ng bansa sa regional sports tournaments, sinabi ni Presidential Spokesman Salvador Panelo na ang sino mang sangkot sa irregularidad ay mananagot.

Nauna rito ay nagpahayag si Pangulong Rodrigo Duterte ng pagkadismaya sa iniulat na mga kapalpakan sa pagho-host bansa sa SEA Games at kaagad na iniutos ang imbestigasyon sa insidente.

“Alam mo si Presidente, kausap ko siya kagabi (Martes), hindi siya masaya sa mga naririnig niya kaya sabi niya, kailangan ayusin nila yung ginagawa nila para hindi tayo mapapahiya sa ibang bansa. Sabi niya, mananagot yung mga may kasalanan kung meron man,” ani Panelo sa radyo ng bayan.

Nang tanungin kung mayroong mapuputukan sa SEA Games mess, sinabi ni Panelo na: “Oo, siyempre accountable yung mga tao diyan kung meron nga kaya kailangang paimbestigahan.”

Inamin niya na nais ng Pangulo na malaman kung totoo ang mga alegasyon ng katiwalian at incompetence sa pamamahala sa hosting ng SEA Games.

“Pinapaimbestigahan pa rin ni Pangulo kung anuman ang mga irregularidad at mga incompetence o corruption na nababalita sa diyaryo kaya nga pinapa-validate,” aniya.

“Iimbestigahan muna natin kung totoo o hindi. Kung totoo, syempre may mananagot ,” dagdag niya.

Ang hosting ng bansa ng SEA

Games ay nabahiran ng logistical complaints gaya ng hindi magandang hotel, transport at food accommodations para sa mga atleta. Bago ang mga kapalpakan, inulan ng batikos ang organizing committee sa pamumuno ni House Speaker Alan Peter Cayetano dahil sa napakamahal na ginastos sa cauldron na paglalagyan ng apoy ng SEA Games.

Nang tanungin kung ilalarga ang imbestigasyon matapos ang palaro, sinabi ni Panelo na: “Oo. Kung ano na yung naplano, ano na yung programa, ituloy-tuloy natin.”

Sa mga ulat na hinainan ang mga atleta ng kikiam sa umagahan, sinabi ni Panelo na nilinaw na ito ng mga awtoridad.

“Mukhang hindi naman daw totoo ang mga balita, gaya daw yung pagkain ng kikiam, hindi daw totoo yun. Sausage naman daw ang pinakain,” aniya.