Babae, tumalon sa riles; biyahe ng LRT-1 naantala

Pansamantalang naantala ang biyahe ng mga tren ng Light Rail Transit Line 1 (LRT-1) matapos isang babae ang tumalon sa riles nito kahapon ng umaga.

Unang napaulat na nahilo ang babae at nahulog sa riles habang papalapit ang northbound train sa Doroteo Jose Station, sa Sta. Cruz, Manila, ngunit malaunan ay nagpalabas ng pormal na pahayag ang Light Rail Manila Corporation (LRMC), na siyang nangangasiwa sa operasyon ng LRT-1, at nilinaw na tumalon ang babae at hindi nahulog sa riles.

Sa statement ng LRMC, nabatid na 6:45 ng umaga nang tumalon ang hindi pinangalanang babaeng pasahero, na nasa 32-anyos ang edad, sa riles sa Doroteo Jose Station habang paparating na ang northbound train.

Agad namang rumesponde ang mga tauhan ng LRMC upang masagip ang pasahero at maialis sa riles.

Kaagad ding dinala ang babae sa Jose Reyes Memorial Medical Center para sa initial medical observation at kinalauna’y inilipat sa Medical Center Manila para sa full medical examination.

Habang isinusulat ang balitang ito ay kasalukuyang sumasailalim sa X-ray, ultrasound at CT scan ang babae. Batay sa initial medical findings ay nagtamo siya ng sugat sa ulo.

Pinuri rin naman ng LRMC ang train operator sa pagiging listo nito ay kaagad na nahila ang emergency break kaya’t hindi nasagasaan ang babae.

Tiniyak ng LRMC na sa kabila ng insidente ay ligtas at maayos ang serbisyo nila sa mga pasahero.

Nananawagan rin sila sa mga sumasakay sa LRT-1 na sumunod sa rules and regulations sa mga istasyon at mga tren.

Dahil sa pangyayari ay pansamantalang natigil ang biyahe ng mga tren ng LRT-1 ng may 24 na minuto at naibalik sa normal ang operasyon nitong dakong 7:09 ng umaga.