12 tindahan kinasuhan sa overpricing ng N95 masks
Kinasuhan na ng Department of Trade and Industry (DTI) ang 12 sa 17 establisyamento sa Bambang, Manila dahil sa umano’y pananamantala sa gitna ng pagtaas ng demand sa N95 masks kasunod ng pagputok ng Bulkang Taal.
Sa isang press briefing sa Malacañang, sinabi ni DTI Undersecretary Ruth Castelo na 12 sa 17 establisyamento na kanilang binisita sa Bambang ang binigyan ng notices of violations para sa pagtataas ng presyo ng mga masks at iba pang medical supply.
Kakasuhan, aniya, ang mga lumabag na negosyo ng administrative at criminal cases bilang paglabag sa Consumer Act.
“We will file administrative and criminal charges for businesses that sell overpriced medical supplies and medicines. The public should also report such cases by sending receipts, documents to prove profiteering,” aniya.
“After the notice of violation, we will issue formal charges against the medical stores in Bambang. Bahala sila mag-defend ng kaso sa hearing (It’s up to them to defend themselves in a court hearing),” dagdag pa nito.
Ayon kay Castelo ilang tindahan sa Bambang ang nagdagdag o nagdoble ng presyo ng N95 masks gayong ang pinapayagan lamang ng batas ay 10-percent profit margin.
Maaari umanong magmulta ang mga tindahan ng P5000 hanggang P2 milyon, kung mapatutunayang lumabag ang mga ito.
Samantala, inirekomenda na rin ni Castelo sa lokal na pamahalaan ng Maynila ang pag-sususpinde sa mga medical supply stores sa Bambang upang matuto sa kanilang ginawa.
FAKE, LOW-QUALITY
Samantala, nagbabala naman ang opisyal sa publiko hinggil sa mga kumakalat na fake o lowquality N95 masks sa merkado matapos madiskubre na ilan sa mga ito ang ibinebenta sa mga establisyamento.
“Kita mo sa material na ginamit at ‘yung itsura, probably hindi rin siya maka-save ng tao mula sa ashfall. The N95 mask is a registered medical device, kailangan may sinusunod na standards kasi ginagamit sa medical processes,” aniya.
Sinabi ng DoH na kukumpiskahin nila ang mga pekeng N95 masks.
Paalala ng ahensiya, ang tunay na N95 masks ay dapat na may naka-imprentang ‘N95’; at makapal at nakasukat para matakpan ang mukha.
“If it’s being sold as N95 mask but is not registered with the FDA or is substandard, pwede silang kasuhan,” pahayag ni Health Undersecretary Eric Domingo.