Brownout, ibinabala sa NCR areas
Kahit umiiral ang modified enhanced community quarantine (MECQ) sa Metro Manila at ilang kalapit na lalawigan, tuloy pa rin ang maintenance works ng Manila Electric Company (Meralco) kaya’t asahan nang makakaranas ng power interruption ang mga lugar na apektado nito.
Sa abiso ng Meralco, sinimulan ang maintenance works kahapon, Agosto 10, at magtatagal hanggang Agosto 16 (Linggo).
Ayon sa Meralco, mula Agosto 10 hanggang 11 ay magkakaroon sila ng upgrading ng facilities sa Tagalag at Bisig Roads sa Barangay Tagalag at Bisig, sa Valenzuela City habang sa Agosto 11 naman ay mayroong pagpapalit ng mga bulok na poste sa Bgy. Mayao Crossing, Lucena City, Quezon Province.
Samantala, sa Agosto 12, inaasahang maaapektuhan ang Binangonan, Rizal dahil sa replacement of pole sa J. P. Rizal Ave. sa Bgy. Libis; Malabon City dahil sa replacement of poles at line reconductoring works sa Sanciangco St. sa Bgy. Catmon; Tanza, Cavite dahil sa reconstruction, relocation at replacement of facilities sa Tanza - Trece Martirez City Road sa Bgy. Paradahan 1; at Cubao, Quezon City dahil sa relocation of facilities sa P. Zamora St. sa Bgy. San Roque.
Sa Agosto 13 naman, mayroong line reconductoring works ang Meralco sa Remedios Circle, Malate, Manila habang sa Agosto 14 ay inaasahang apektado ang Sto. Tomas, Batangas, at Calamba City at Los Baños, Laguna dahil sa NGCP upgrading of facilities sa NGCP Bay – Calamba 69kV transmission lines.
Sa Agosto 15 naman, mayroong nakatakdang relocation of pole at reconductoring of primary lines sa Christian St. sa Grace Village, Apolonio Samson, Balintawak, Quezon City; relocation of poles at line reconstruction works sa G. De Borja St., Bgy. Aguho, Pateros; at upgrading of facilities sa Don Placido Campos Ave. sa Bgy. Sabang, Dasmariñas City, Cavite, na inaasahang makakaapekto sa ilang panig ng Dasmariñas City at Gen. Trias City.