5% discount sa online learning-related expenses, ipinanukala

Ipinanunukala ni Bohol 3rd District Rep. Kristine Alexie Tutor na magbigay ng limang porsyento na diskwento sa mga pangunahing serbisyo tulad ng pagkain at gamot, at sa pagbili ng mga libro, mga gamit sa paaralan, at electronic devices na ginagamit para sa online learning sa mahihirap na mga mag-aaral sa lahat ng antas, kabilang ang mga nakatala sa mga institusyong technical-vocational (techvoc).

Inihain niya ang House Bill No. 7224, ang panukalang “underprivileged Student Discount Act of 2020,” upang magbigay ng pinansiyal na kaluwagan sa mga underprivileged students at kanilang pamilya sa panahong ito ng COVID-19 pandemic.

“Moreover, it also seeks to give them discounts on educational expenses, such as tuition, miscellaneous, and other school fees, including the purchase of books, school supplies, and electronics for purposes of participating in online or distance learning,” sinabi ni Tutor.

Sa ilalim ng panukalang batas ni Tutor, ang mga diskwento na ipinagkaloob ng mga establisimiento sa mahihirap na mag-aaral ay dapat ituring bilang allowable deduction mula sa kanilang gross income..

Sa ilalim ng HB 7224, ang underprivileged student ay tumutukoy sa isang mag-aaral na Pilipino na nakatala sa basic education, post-secondary non-degree tech-voc courses, at mga naka-enroll sa bachelor’s degree programs sa kolehiyo, na ang mga magulang ay may taunang kita na hindi hihigit sa P250,000, na sasailalim sa pagrepaso ng National Economic and Development Authority (NEDA) tuwing tatlong taon.