‘Pinas masisiguro ang COVID-19 vaccine mula Russia, US
Nilinaw ni Senador Christopher “Bong”Go na hindi lamang sa China umaasa ang pamahalaan sa pagsugpo sa coronavirus, kundi maging sa Russia, United States at iba pang bansa.
Inilahad niya na nag-abiso ang Russia, sa pamamagitan ni Ambassador of the Russian Federation to the Philippines Igor Khovaev, na malapit nang makumpleto ng Russia ang pagbuo ng bakuna at kasama ang Pilipinas sa mabibigyan at katunayan kinukonsidera nila na dito magsagawa ng clinical testing.
“Nagpahiwatig ang Russian government, through Ambassador Igor Khovaev, na natapos na nila ang clinical trials, ang phase 3, para sa vaccine against COVID19. Kasalukuyang inaayos na lang ang mga government registration papers nito, Tatlong bagay ang nasa offer ni Ambassador Khovaev. Una, na dito rin sa Pilipinas magconduct ng clinical trials. Magsu-supply din sila sa atin ng bakunang ito kontra COVID19. At, pangatlo, plano nilang mag-set up ng local manufacturing dito mismo sa bansa natin,” paliwanag ni Go, chairman ng Senate commitee on health.
Ang tinutukoy na bakuna ay ang “Avigav ir” na dinebelop ng National Research Center of Epidemiology and Microbiology sa ilalim ng pangalang N.F. Gamaleya ng Russian Ministry of Health. Ito rin ang nakagawa ng bakuna laban sa Ebola virus, sa at Middle East Respiratory Syndrome (MERS) virus na sinuportahan ng Russian Direct Investment Fund (RDIF). Ang RDIF ang nakipag-ugnayan sa Pilipinas para sa paggawa at pamamahagi ng bakuna ng COVID-19.
“Dahil sa maayos na independent foreign policy of ‘being an enemy to none and a friend to all’ ni Pangulong Duterte, nasisiguro ng pamahalaan natin na meron tayong access sa development at, eventually, mga supply ng bakuna kontra COVID-19 mula sa mga bansa na itinuturing nating mga development partners,” dagdag ni Go.
Samantala, binanggit ni Go na kinumpirma ni Philippine Ambassador to the United States, Jose Manuel Romualdez, na hinihikayat ni US Secretary of State Mike Pompeo ang dalawang vaccine manufacturers na makipagpulong kay Romualdez ngayong linggo.
Ang Novavax, na gawang US, ang isa sa mga pinag-uusapang bakuna.
May anim na bakuna na ang nakapasok sa Phase 3 trials, ayon kay Michael Ryan, executive director ng oWorld Health Organization – Health Emergencies Program.