Makataong ‘Dirty Harry’
ISANG malaking pagkalimot kung palalampasin ko ang pagkakataong ito nang hindi naguukol ng isang luksang pagdakila sa isang kaibigan at idolo na napabantog sa halos lahat ng larangan ng pakikipagsapalaran at lalo na sa matapat na paglilingkod sa bayan. Isa itong eulogy na pinaniniwalaan kong iuukol din ng ating mga kapatid sa
pamamahayag -- lalo na ng National Press Club of the Philippines -- kay Manila Mayor Alfredo S. Lim na sumakabilang-buhay kamakailan dahil sa isang karamdaman.
Si Mayor Lim lamang, sa aking pagkakatanda, ang non-media practitioner na dinakila ng NPC; sa pamamagitan ng ‘Tribute to the Dirty Harry of the Philippines’. Ang makasaysayang okasyong ito na idinaos sa Manila Hotel maraming taon na rin ang nakalilipas ay produkto ng samasamang pagsisikap ng ating mga kapatid sa pamamahayag, lalo na nga ng NPC Board na nagkataong pinamumunuan natin noon.
Unang nakilala si Mayor sa pagpapatupad ng batas o bilang isang law enforcer. Ang kanyang mahigit na tatlong dekada bilang isang alagad ng batas ay kasing-kahulugan ng kanyang matapang na paglipol ng kriminalidad, kabilang na ang illegal drugs. Hindi ko malilimutan, halimbawa, ang
kanyang pakikiisa sa pagsugpo ng mga karahasan sa lungsod, lalo na sa Intramuros na noon ay pinamumugaran ng mga kriminal. Ang naturang lugar ay kanugnog lamang ng gusali ng NPC.
At lalong hindi malilimutan ang maningning na paglilingkod ni Mayor Lim hindi lamang bilang Alkalde ng Maynila kundi bilang isang Senador. Naging Director ng National Bureau of Investigation (NBI) noong Panahon ni Presidente Corazon Aquino at Kalihim ng Department of the Interior and Local Government (DILG) sa panunungkulan ni Pangulong Erap Estrada.
Subalit sa pagiging isang alagad ng batas o pulis lalong napabantog si Mayor Lim -sa kanyang matinding malasakit upang mapangalagaan ang katahimikan ng siyudad laban sa mga kriminal. Natitiyak ko na ito ang dahilan upang siya ay taguriang ‘Dirty Harry of the Philippines ‘. At ito rin ang
isa sa pangunahing dahilan upang siya ay parangalan ng NPC.
Sa aking pagkakaalam, ang ‘Dirty Harry’ ay isang American action series na nagtatampok sa isang pulis na miyembro ng San Francisco Police Department na ang tunay na pangalan ay Harry Callahan. Siya ay napabantog dahil sa kanyang marahas na mga pamamaraan sa paglipol ng mga kriminal at mamamatay-tao na iniaatas sa kanya upang arestuhin. Ito ba ang sinasabing kaliwa’t kanang pagpuksa ng mga salot ng lipunan?
Totoong matindi ang adhikain ni Mayor Lim sa paglikha ng isang tahimik na siyudad ng Maynila. Subalit gusto kong maniwala na ito ay naisagawa niya bilang isang makataong ‘Dirty Harry’.
Isang taimtim na pakikidalamhati sa iyong mga mahal sa buhay, Mayor Lim. Sumalangit nawa ang iyong kaluluwa.