Hiritan ng Beermen at Bolts
Mga Laro Ngayon
(AUF Gym-Angeles City,Pampanga) 4:00 n.h. -- Magnolia vs Blackwater 6:45 n.g. -- Meralco vs San Miguel
UNAHAN sa pagtala ng ikatlong sunod na panalo para makasalo sa Phoenix sa ika-apat na puwesto ang tatangkain ng magkatunggaling Meralco at San Miguel Beer sa tampok na laro ngayon sa pagpapatuloy ng 2020 PBA Philippine Cup restart sa Pampanga.
Ganap na 6:45 ng gabi ang salpukan ng Bolts at ng Beermen pagkatapos ng unang tapatan sa pagitan ng Magnolia at Blackwater ganap na 4:00 ng hapon sa Angeles University Foundation Gym.
Tinalo ng Beermen ang Alaska Aces nitong Sabado, 92-88 para sa una nilang back-to-back win sa loob ng bubble na nag-angat sa kanila sa markang 3-2 karta.
Nauna rito, kinumpleto din ng Bolts ang dalawang sunod na panalo nitong Biyernes matapos pataubin ang NLEX, 101-92 upang umangat sa likuran ng Fuel Masters na nagsosolo sa 4th spot hawak ang barahang 4-2.
Sa unang laban, manatili at tumatag sa kinalalagyang top 8 ang hangad ng Blackwater (2-3) sa pagsagupa nito sa Magnolia (2-4) para palakasin ang tsansang umabot ng playoff.
Tatangkain ng Elite na bumangon sa kinasadlakang dalawang dikit na kabiguan sa kamay ng Alaska at TNT habang siaikapin naman ng Hotshots ma madugtungan ang naitalang panalo kontra sa dating undefeated na Barangay Ginebra sa nakaraang Bubble Classico noong Lunes.