Kidnapper, arestado sa Zamboanga

Naaresto ng mga tauhan ng Philippine National Police-Anti-Kidnapping Group (PNP-AKG) ang isang pinaghihinalaang kidnapper na dumukot sa isang Filipino-American farmer sa Barangay Arena Blanco, Zamboanga City, kamakailan.

Under custody na ng pulisya ang suspek na si Anerson Manabahi Tungayao, taga-Bgy. Tapanayan, Sirawai, Zambonga de Norte.

Dinampot si Manabahi sa hideout nito sa Bgy. Arena Blanco, Zamboanga City, nitong Miyerkules ng hapon.

Si Manabahi ang itinuturong dumukot kay Rex Triplitt nitong Setyembre 16 gayunman, nailigtas ito sa isang operasyon nitong Setyembre 30.

Inihayag naman ni PNP-AKG director Brig. Gen. Jonel Estomo, isinagawa ng mga tauhan nito ang operasyon sa pakikipagtulungan Police Regional Office-9 Intelligence Division at Zamboanga City Police Office.

Narekober sa suspek ang isang M16 Armalite rifle.

Nahaharap ang suspek sa kasong kriminal, ayon pa sa pulisya.