8 sundalo, kinapitan ng COVID-19

GUIMBA, Nueva Ecija – Walong miyembro ng 84th Infantry Battalion ng Philippine Army na naka-base sa Camp Kapitan Berong, Barangay Cavite ang iniulat na tinamaan ng coronavirus disease 2019.

Ito ang inihayag ng Department of Health-Nueva Ecija kahapon.

Ayon sa DOH, ang walong sundalo ay kabilang sa 10 active cases at ang dalawa pang nahawaan ng virus ay pawang taga-Bgy. Maturanoc sa nasabing bayan.

Dahil dito, iniutos kaagad ng municipal inter-agency task force ang pagsasagawa ng contact tracing, disinfection at pagbibigay ng food packs sa mga residenteng naapektuhan ng nabanggit na sakit.

Sa kabuuan, may 32 kumpirmadong kaso ng COVID-19 sa nasabing bayan, kabilang ang 19 gumaling at tatlo naman ang binawian ng buhay.