Mabilis na biyahe ng MRT-3, tiniyak

Walang pandemya at sama ng panahon ang makapipigil sa layunin ng Department of Transportation (DOTr) at (Metro Rail Transit (MRT)-3, sa pamumuno ni Secretary Arthur Tugade, na bigyan ng mas mabilis, maayos at kumportableng biyahe ang ating kababayan.

Kahapon, isinagawa ang simulation run para sa general overhauled light rail vehicles (LRVs) o bagon ng MRT-3, na binubuo ng isang train set na may 3 bagon, upang masigurong ligtas ang mga ito para sa revenue operations.

Kapag nasigurong safe na gamitin ang mga ito, maidadagdag ang mga ito sa operational trains na dine-deploy sa mainline.

Bukod dito, nagsagawa rin ng simulation run para sa MRT-3 trains upang subukan ang bilis na 50 kilometer per hour (kph) ng mga tren.

Ito ay bilang paghahanda sa pagtaas ng speed ng mga tren na 50 kph sa susunod na buwan.

Matatandaang simula nitong Oktubre 1, pinabilis ang takbo ng mga tren sa 40kph mula sa dating 30kph, matapos ang konstruksyon ng mga bagong riles sa lahat ng istasyon ng rail line na bahagi ng malawakang rehabilitasyon ng ahensya, katuwang ang maintenance provider nito, ang Sumitomo-Mitsubishi Heavy Industries mula sa Japan.

Sa pagtakbo ng mga tren na 50 kph, mapapababa ang tagal ng paghihintay ng mga pasahero.

Mula sa dating 8.5 hanggang 9 na minutong headway o oras sa pagitan ng mga tren, bababa ito sa 5.5 hanggang 6 minuto para sa 20 tren na tumatakbo sa mainline. Kabilang na dito ang bagong bagon ng dalian.

“Ang mga ito ay nagpapatunay lamang na focus kami sa aming trabaho. We are going back to the original form of MRT-3. Dahil ito sa mahusay na pamumuno ng ating mahal na DOTr Secretary Art Tugade, na hangad lamang ang mabigyan ng kombinyenteng at kumportableng biyahe ang ating mga commuters,” sabi naman ni MRT-3 Director for Operations Michael Capati