Ikonsidera ang bisa ng bakuna upang maiwasan ang malalang sakit: eksperto

INABISUHAN ng isang eksperto sa kalusugan ang publiko na ikonsidera ang bisa ng isang COVID-19 vaccine upang maiwasan ang malubhang sakit at hindi lamang ang abilidad nitong maprotektahan ang tao mula sa pagkakaroon ng COVID-19.

Sa isang online media forum, binigyang-diin ni UP-National Institute of Molecular Biology and Biotechnology Director at Department of Health Technical Advisory Group member Dr. Edsel Salvana na karamihan ng tao ay nakatuon sa kabisaan ng bakuna na makaiwas sa sakit sa pangkalahatan.

"Let's look at the vaccine efficacy to prevent severe disease. Kasi 'yun naman po talaga ang pinakaproblema natin sa COVID, na nakamamatay ito, in about 2 to 5 percent of people," ani Salvana.

Binigyang kahulugan ni Salvana ang vaccine efficacy bilang resulta ng clinical trial habang ang vaccine effectiveness bilang "what happens in the real world".

"Kasama na diyan iyong mga taong ayaw magpabakuna or 'yung mga taong nabakunahan pero hindi bumalik para sa second dose. So, generally the vaccine effectiveness will be lower than our vaccine efficacy, but we know what the ideal is and that is what the vaccine efficacy will show," aniya.

Taliwas sa espekulasyon ng marami, ayon sa mga eksperto sa kalusugan at bakuna ang

SARS-CoV-2 mutations ay hindi makaaapekto sa kabisaan ng bagong bakuna lalo’t iilang mutation pa lamang ang naiuulat sa ngayon.

"Vaccine efficacy can happen but it's not overnight like 95 percent then immediately zero. It will be gradual, 95, 90, 85, 80, so, kelangan talaga ang surveillance na ginagawa natin ngayon and we'll have other programs that can check vaccine efficacy," paliwanag ni Salvana.

Nitong Huwebes, inaprubahan ng Food and Drug Administration (FDA) ang emergency use authorization (EUA) para sa COVID-19 vaccine ng Pfizer-BioNTech (BNT162b2).

Patuloy pa ang evaluation para sa aplikasyon ng AstraZeneca vaccine ng EUA habang hinihintay pa ng mga eksperto ang ilang paglilinaw mula sa pharmaceutical firm.

Para naman sa vaccine clinical trials, nakatanggap na ang FDA ng aplikasyon mula sa Sinovac, Clover, at Janssen.

Binigyan ang Janssen ng apruba na makapagsimula ng kanilang clinical trials bansa ngayong buwan.

Samantala, hinihintay pa ng FDA ang pagsusumite ng Sinovac at Clover ng dagdag na dokumento na kailangan upang ma-review ang kanilang aplikasyon.