Police force, iniimbestigahan sa extortion
Iniimbestigahan na ngayon ng pulisya ang buong puwersa ng Binangonan Police Station sa Rizal kaugnay ng posibleng pagkakasangkot sa nabunyag na systematic extortion activities kasunod ng pagkakaaresto ng dalawang civilian assets nito sa isang entrapment operation sa harap ng municipal hall, kamakailan.
Inihayag ni Philippine National Police (PNP) chief, Gen. Debold Sinas, kabilang sa iniimbestigahan ang hepe ng Binangonan Police na si Lt. Col. Ferdinand Ancheta sa usaping command responsibility matapos kilalanin ng complainant ang anim sa kanyang tauhan na pumupuwersa kanya na magbigay ng pera kapalit ng pagpapalabas ng na-impound na sasakyan nito.
Ang tinutukoy na mga pulis ay sina Senior Master Sgt. Randy Andanar; Staff Sgts. Joel Acosta at Joe Sevillena; Corporals Allan Alvarez, Marson Tabayan at EW Armesnis.
“I will not let this incident pass without implementing appropriate criminal and administrative action against those involved,” sabi ni Sinas.
Nilinaw naman ni Col. Thomas Frias, hepe ng PNP-Integrity Monitoring and Enforcement Group (IMEG), naglunsad ng operarasyon ang mga tauhan nito matapos makatanggap ng reklamo mula sa complainant kaugnay ng pangingikil sa kanya ng ilang tauhan ng Binangonan Police.
Kinilala ni Frias ang dalawa na sina Albert Domingo, alyas Joel; at Pablo Dolfo, alyas Botchok, at kapwa naaresto sa harap ng
Binangonan Municipal Hall matapos tanggapin ang marked money.
“Those arrested turned out to be civilian assets of the Binangonan Municipal Police Station,” sabi ni Frias.
Sinabi ni Frias na natuklasan din nila sa imbestigasyon na hindi nakakulong ang isang pulis na nahaharap sa kasong Infidelity in the Custody of Prisoners at nagsisilbi pa itong lookout sa naganap na entrapment operation.
Kinilala ito na si Corporal Archieval Perez. Natuklasan din ng pulisya na gumagamit si Perez ng dalawang cellular phone habang nakikipagtransaksyon sina Domingo at Dolfo sa mga tauhan ng IMEG.