Ilang tagasuporta ni Navalny inaresto sa antiPutin protests
Tinatayang daan-daang raliyista ang inaresto ng Russian police sa pagdagsa ng libo-libong tagasuporta ng ikinulong na Kremlin critic Alexei Navalny sa mga lansangan kasunod ng panawagan laban sa pamumuno ni President Vladimir Putin.
Hinikayat ng pinakamasugid na kritiko ni Putin ang mass rallies matapos malampasan ang near-fatal poisoning mula sa Novichok nerve agent at magbalik ng Moscow nitong nakaraang weekend matapos ang ilang buwang gamutan sa Germany. Sinalubong ng pag-aresto si Navalny sa Sheremetyevo Airport at agad ikinulong.
Inaasahang ang protesta nitong Sabado ay isang malaking pagsubok sa abilidad ng oposisyon na makapagmobilisa sa kabila ng tumaas na pressure ng Kremlin sa mga kritiko at ang coronavirus pandemic.
Bago ang demostrasyon, inilabas ng kampo ni Navalny ang isang imbestigasyon sa isang opulent Black Sea property na umano’y pag-aari ni Putin. Nasa higit 65 million na ang views nito mula nang ilabas.
Sa Pacific port ng Vladivostok, nagtipon ang mga raliyista sa city centre, habang isinisigaw ang “Putin is a thief” at “Freedom to Navalny!”
Makikita naman sa AFP footage ang mga pulis na naka-full riot gear habang hinahabol ang mga nagpoprotesta at pinapalo ng baton.
Dagsa din ang mga ralisyista sa iba pang siyudad sa Far East at Siberia kabilang sa Khabarovsk, Novosibirsk at Chita kung saan libo-libo ang nagtipon.
Sa Yakutsk south ng Arctic Circle, tuloy rin ang mga nagpoprotesta sa kabila ng matinding lamig ng temperatura na umaabot ng minus 50 degrees Celsius (-58 Fahrenheit).
Sa OVD Info, sinasabing halos 200 katao ang inaresto sa halos 20 siyudad dulot ng rally.