‘Asia’s El Chapo’ arestado sa Amsterdam
AMSTERDAM (AFP) — Ang sinasabing ringleader ng pinakamalaking crime syndicate sa Asia at isa sa most wanted sa mundo ay naaresto sa Netherlands, at ipinursige ng mga awtoridad ng Australia nitong Linggo ang kanyang extradition upang harapin ang paglilitis.
Matabal nang hinahabol ng pulisya ang hinihinalang kingpin ng droga na si Tse Chi Lop, 57, sa loob ng maraming taon hanggang sa siya ay naaresto ng Dutch police noong Biyernes na kumikilos sa kahilingan mula federal police ng Australia.
Sa isang pahayag nitong Linggo, sinabi ng mga awtoridad ng Australia na isang lalaki of significant interest” sa law enforcement agencies ay na-detain. Kinumpirma ng isang tagapagsalita ng pulisya ang kanyang pangalan bilang si Tse Chi Lop. Ang Chinese-born Canadian citizen ay tinaguriang “El Chapo” ng Asia na tinukoy sa palayaw ng Mexican drug lord na si Joaquin Guzman, na pinagsentensiyahan ang habambuhay sa isang kulungan sa US.
Kinumpirma ng Dutch police spokesman Thomas Aling na “a suspect who figured on Europol’s list of the most wanted persons” ay naaresto noong Biyernes ng umaga matapos dumating sa paliparan ng Schiphol ng Amsterdam.
Hindi sinabi kung saan nagmula ang flight. “This person is currently incarcerated, waiting to see what will happen as it has to do with an Australian investigation,” dagdag ni Aling.
“An extradition will take place at Australia’s request, and the matter will proceed like that.”
Si Tse Chi Lop ay pinangalanan ng UN Office on Drugs and Crime (UNODC) bilang hinihinalang pinuno ng Asian megacartel na kilala bilang “Sam Gor”, isang pangunahing producer at supplier ng mga methamphetamines sa buong mundo.
Pinaniniwalaang nailalabas ng Sam
Gor ang bilyun-bilyong pera ng droga sa pamamagitan ng mga negosyong umuusbong sa rehiyon ng Mekong sa Timog Silangang Asya - kabilang ang mga casino, hotel at real estate. Karamihan sa meth ng Asia ay nagmula sa mga lugar na hangganan ng “Golden Triangle” sa pagitan ng Laos, Myanmar, Thailand at timog-kanlurang China na nagsusuplay ng walang katulad na dami ng synthetic drugs sa mga pandaigdigang merkado.
Sinabi sa isang pag-aaral sa UNODC na ang crime groups sa Timog Silangang Asia ay kumita ng higit sa $60 bilyon sa isang taon. Ang paggawa ng methamphetamine alinman sa pormang tabletas na “yaba” o ang napakalakas na crystallized “ice” na bersyon - pati na rin ang ketamine at fentanyl ay nagaganap pangunahin sa silangang estado ng Shan, Myanmar ngunit ang karamihan sa precursor chemicals na kinakailangan upang lutuin ang mga ito ay dumadaloy sa kabila ng hangganan mula sa China.