PRC tumatangap na ng saliva sample
Bilang panimula, tumatanggap na ng saliva sample ang mga laboratoryo ng Philippine Red Cross (PRC) para sa coronavirus disease (COVID-19) test ayon kay Molecular Laboratory head Dr. Paulyn Ubial.
“Meron tayong online booking pero tumatanggap kami ngayon, as of this week siguro, ng walk-in,” wika ni Ubial sa isang panayam.
Aniya, maaaring kumuha ng appointment para sa saliva test sa website ng PRC.
“Ito ay available sa ating molecular laboratories sa Mandaluyong sa may Pinatubo St. at saka dito sa Port Area sa Manila,” lahad niya. Nitong Sabado, inaprubahan ang paggamit ng saliva sample para sa COVID-19 testing ng Department of Health para sa PRC.
Pero ayon sa DOH, naghihintay pa ito ng balidasyon ng Research Institute for Tropical Medicine bago payagan ang iba pang laboratoryo sa bansa.
Ayon kay Ubial, 98 porsyento ang accuracy ng bagong paraan ng COVID19 testing. Tatagal ng tatlo hanggang apat na oras ang pagproseso ng sample ngunit mas tatagal ito dahil sa iba pang nakalinyang sample.
“Hindi po kami makaka-promise na agad-agad kasi depende sa volume. Pero ang commitment po ng Red Cross, less than 24 hours,” ani Ubial.
Paalala niya, iwasang kumain, uminom, manigarilyo, mag-gargle, at magsipilyo 30 minuto bago kolektahin ang sample.
Nagkakahalaga ng P2,000 ang kada test sa PRC. “Sa ngayon po, hindi pa puwedeng i-charge sa PhilHealth kasi hindi pa ho gumagawa ng benefit package ang PhilHealth so antayin na lang po natin. Sa palagay namin sa ilang mga araw ay lalabas na rin,” ani Ubial.
Ang saliva testing ayon sa PRC ay mas mabilis, mas madali, at mas murang testing kumpara sa RT-PCR test.
Nilinaw ni Senator at PRC chairman Richard Gordon na parehas na RT-PCR technology ang gagamitin sa saliva testing at swab testing.