Davao-Cocolife Tigers, handa sa pagbabalik ng MPBL

KONDISYON ang Davao Occidental Cocolife Tigers sa sandaling mapayagan ang pagbabalik aksiyon ng Maharlika Pilipinas Basketball League (MPBL).

Ayon kay Tigers deputy team manager Ray Alao, bagama’t naudlot ang liga dahil sa pandemya, optimistiko ang koponan ni Dumper Party List Congresswoman Claudine Bautista ng Davao Occidental sa timon ni manager Dinko Bautista at basketball operation head Bong Baribar, na maririnig muli ang atungal ng bangis ng Tigers sa hardwood sa tamang tiyempo upang maituloy na ang misyong national championship sa MPBL na inorganisa ni sports icon Senator Manny Pacquiao.

“Hundred percent condition sina Mark ( Yee), Bonbon( Custodio) , Billy( Robles) at iyong mga players nating nakabase sa Davao at Cebu na tuloy ang training via zoom bukod sa physical conditioning sa kani-kanilang balwarte sa panahon ng lockdown.Our Tigers are raring to roar,” sambit ni Alao sa team na suportado nina Cocolife president Atty.Jose Martin Loon,Retail Division Chief Senior VP Joseph Ronquillo, VP Rowena Asnan at EVP Franz Joie Araque.

Hinihintay na lamang ng pamunuan ng MPBL ang pahintulot mula sa Inter -Agency Task Force ( IATF) on Covid-19 upang maituloy na ang nalalabing laro ng naudlot na Lakan Cup.

Ang Davao Occidental Cocolife Tigers, Basilan Steels, Makati Super Crunch at defending champion San Juan Knights ang mga natitirang teams sa Lakan Cup na nagtutunggali sa South at North Division.

Haharapin ng Davaoenos ang karibal na Basilan sa isang rubbermatch sa South Division kung saan ang mananalo ay makakalaban ang magwawagi sa pagitan sa North Division na Makati vs San Juan para sa prestihiyosong national championship ng Lakan Cup.