Roque kay Hontiveros: Mag-enroll ka
Mag-enroll ka sa klase kung maiisipan mong bumalik sa pagtuturo hinggil sa international law.
Ito ang panghihikayat ni Presidential spokesperson Harry Roque kay Senador Risa Hontiveros matapos siyang birahin ng huli sa ginawang pagtatanggol sa China.
Bagama’t pinupuri ni Hontiveros ang naging hakbang ng pamahalaan na maghain ng diplomatic protest sa China sa isyu pa rin ng West Philippine Sea ay binira naman nito si Roque sa umano’y pag-aabogado sa Tsina.
“Baka kailangan ni Presidential Spokesperson Harry Roque ng kaunting oras na magmuni-muni at mag-reflect. Sana ay pag-isipan muna ang sitwasyon kaysa sa mag-abogado para sa Tsina at magkibit-blikat sa lantarang pambabalewala nito sa international law na pumoprotekta sa ating interest,” ang naunang pasaring senador kay Roque.
Tugon naman ni Roque, “Hindi ko po alam kung ano ang sinasabi ni Senator Risa Hontiveros. As past President of Asian Society of International Law (AsianSIL), siguro alam ko naman po ang international law. 15 taon ko po ‘yan tinuro, fulltime sa UP at nagkaroon po ako ng advanced training sa internation law.”
“Malinaw po ang sinabi ko noong lumabas po iyong bagong batas ng Tsina na sinasabi ko na bagama’t mayroon silang kapangyarihan gumawa ng kanilang mga batas ay kinakailangan na sang-ayon iyan sa general international law na pinagbabawal ang paggamit ng dahas, except by way of self defense or when authorized by the security council,” buweltang pahayag ni Roque.
“Hayaan mo Senator Risa Hontiveros, if you want, if I go back to teaching, you can enroll in my class. Hindi ko lang alam kung ano ang magiging grade mo,” dagdag na pahayag ni Roque na nangingiti pa.