Kudeta sa Myanmar; Suu Kyi idinetine
NAYPYIDAW (AFP) — Nagsagawa ng kudeta ang militar ng Myanmar nitong Lunes, idinetine ang de facto leader na si Aung San Suu Kyi at idineklarang kontrolado nito ang bansa sa loob ng isang taon sa ilalim ng state of emergency.
Nangyari ito pagkaraan ng maraming linggo ng tumataas na tensyon sa pagitan ng militar, na namuno sa bansa sa loob ng halos limang dekada, at ng pamahalaang sibilyan tungkol sa mga alegasyong pandaraya sa halalan noong Nobyembre.
Nagpahiwatig ang militar noong nakaraang linggo na maaari nitong sakupin ang kapangyarihan upang maisaayos ang mga paratang ng mga iregularidad sa mga botohan, na madaling napanunan ng partidong National League for Democracy (NLD) ni Suu Kyi.
Sina Suu Kyi at President Win Myint ay nakakulong sa kabiserang Naypyidaw bago magmadaling araw nitong Lunes, sinabi ng tagapagsalita ng NLD na si Myo Nyunt sa AFP, ilang oras bago ang parlyamento ay nakatakdang magbalik sa kaunaunahang pagkakataon mula noong halalan.
“We heard they were taken by the military... With the situation we see happening now, we have to assume that the military is staging a coup,” sinabi niya. Kasunod nito ay magdeklara ang militar, sa pamamagitan ng sarili nitong television channel, ng isang taong state of emergency. Sa Yangon, ang dating kabisera na nananatiling sentro ng komersyo ng Myanmar, sinakop ng mga tropa ang city hall, ayon sa isang mamamahayag sa AFP.
Sa iba pang lugar, ang punong ministro ng estado ng Karen at maraming iba pang mga ministrong pangrehiyon ay ikinulong din, ayon sa impormante ng partido, sa mismong araw na gaganapin ang bagong sesyon ng bagong parlyamento.Ang mga kaganapang ito ay nagdulot ng mabilis na tugon mula sa United States at Australia, na kapwa nananawagan para palayain ang mga nakakulong na pinuno ng NLD at mapanumbalik ang demokrasya.