US, stabilizing force at counterbalance vs China
NANINIWALA si Defense Secretary Delfin Lorenzana na lalong bubuti at sisigla ang relasyon ng Pilipinas sa United States sa ilalim ng administrasyon ni US Pres. Joseph Robinette Jr. (Joe Biden).
Inaasahan ng PH defense chief na ang pag-pivot o pagbaling ni Biden sa Asia strategy ay siguradong magbibigay ng kabutihan at benepisyo sa Pilipinas, partikular sa aspeto ng maritime interests sa South China Sea.
“Nais naming i-welcome nang buong kasiyahan ang pagbabago ng liderato sa US government, at umaasa na ang malakas at mapagkakatiwalaang pagkakaibigan ng Pilipinas at ng US ay lalo pang sisigla. After all, the decades old alliance has endured multiple changes of administration on both sides amid numerous challenges in the relationship,” pahayag ni Lorenzana.
Kinikilala niya na ang US ay nagsisilbing “stabilizing force” sa Indo-Pacific region at isang “counterbalance” sa gitna ang agresibong mga aksiyon ng China sa South China Sea, kabilang ang West Philippine Sea (WPS).
Kamakailan, nagpasa ang dambuhalang China ng bagong batas na nag-aawtorisa sa China Coast Guard ships nito na paputukan ang mga foreign vessels na pumapasok sa mga lugar o teritoryo na inaangkin nito. Umalma rito si Foeign Affairs Sec. Teddy Locsin at naghain ng diplomatic protest.
Sa hindi malaman o hindi sinasadyang situwasyon, ang US ay nag-deploy ng aircraft carrier USS Theodore Roosevelt sa South China Sea upang maisulong at mapalakas pa ang kalayaan sa karagatan.
Sinabi ni Lorenzana na ang matagal nang hidwaan o geopolitical rivalry sa pagitan ng US at China ay susubok sa kakayahan at katalinuhan ng mga opisyal ng Pinas sa pagbalanse sa mga relasyon nito sa dalawang higanteng bansa.
Bagamat nagpapamalas ng mainit na pakikipag-ugnayan si Pres. Rodrigo Roa Duterte (PRRD) sa Beijing (China) sapul nang nahalal na pangulo noong 2016, binigyangdiin ni Lorenzana ang kahalagahan ng pagpapanatili ng relasyon ng PH sa Washington (US), ang pinakamatagal na alyado ng bansa sa buong mundo.
Nagpapasalamat si Lorenzana sa pagkakahirang kay dating US Ambassador to the Philippines Sung Kim sa US Department State, na ang partikular na assignment ay sa Asia dahil si Kim ay nagtataglay ng malalim na kaalaman at pagkaunawa sa kalagayan ng Pilipinas.
“With the appointment to the US Department of State of former Ambassador to the Philippines Sung Kim, who has a deeper understanding of the Philippines, we are hopeful that prudence and proper restraint will be exercised in dealing with other countries’ domestic affairs,” ayon kay Lorenzana.
Binigyang-diin niya na pananatilihin ng bansa ang independent foreign policy upang mapangalagaan ang ating soberanya at pambansang interes. “We will maintain and enhance our existing alliance while exploring potential partnership, all for the advancement of our country and the welfare of our people”.
Komento ng dalawa kong kaibigan sa kapihan: “Kung totoong independent foreign policy ang isinusulong at itinataguyod ng Duterte administration, eh bakit malapit na malapit ito sa China at hindi kumikibo kahit katakut-takot na paglabag at pag-angkin sa teritoryo ng Pinas sa WPS ang ginagawa nito?” Sana raw ay maging iba ang desisyon at estratehiya ni President Biden sa WPS upang mapigilan ang China sa patuloy na pag-okupa/pag-angkin sa mga reef, shoal at isle na napakalayo sa hurisdiksiyon nito.