Pagtugis sa mga salot
SA gitna ng mga alegasyon hinggil sa patuloy na pagtaas ng lahat ng mga bilihin, naniniwala ako na humupa ang pagkabagabag ng mga mamimili na ginigiyagis ng naturang problema na kinabibilangan ng pagsasamantala ng ilang profiteers at price manipulators; iniulat na bumuo ang gobyerno ng isang mistulang task force na tutugis sa itinuturing na mga salot sa pamilihan; ilang negosyante na walang inaalagata kundi magkamal ng malaking pakinabang sa kapinsalaan at ibayong pagpapahirap sa mga konsyumer.
Ang naturang grupo na magmumula sa iba’t ibang ahensiya ng pamahalaan ay inatasang ugatin ang dahilan ng walang patumanggang pagtaas ng halaga ng mga paninda; kung ang mga iyon ay kabilang sa mga sindikato na walang ibang hangarin kundi lumikha ng artificial supply shortage upang mapilitan ang sambayanang bilhin sa mataas na presyo ang kanilang mga pangangailangan.
Hangad ng taumbayan na masugpo ang gayong mga pagsasamantala lalo na sa panahong ito na patuloy ang matinding banta ng nakatatakot na coronavirus. Napag-alaman ko na ang nabanggit na grupo ay binubuo ng mga kagawaran na tulad ng Trade and Industry (DTI), Agriculture, Interior and Local Government; kabilang din dito ang iba pang security agency na tulad ng National Security, National Intelligence Coordinating Agency at maging ang mga police at military groups. Nagkaroon kaya ng positibong resulta ang pagtugis at paglipol sa itinuturing na mga salot ng pamilihan?
Totoong masyadong nakababahala na ang pagtaas ng presyo ng ating mga pangangailangan. Sa kabila ito ng mahigpit na babala ng nabanggit na mga kagawaran at ahensiya ng gobyerno laban sa ilang price manipulators; sa naturang mga negosyante na sinasabing namimili ng mga karne ng baboy, manok at gulay, isda sa murang halaga at ibinebenta naman sa mataas na halaga. At may mga haka-haka pa na mismong mga hog at chicken raisers ang pasimuno sa pagtatakda ng presyo sa naturang mga produkto.
Hindi kumukupas ang mga pagtataka kung bakit tila hindi natitigatig ang ilang negosyante sa kanilang mapanlamang na hanapbuhay. Sa kabila ito ng mahihigpit na kautusan laban sa profiteering at sa paglabag sa suggested retail price na pinaiiral kasabay ng deklarasyon ng national calamity sa bansa; makakaagapay dito ang napipintong pagpapatupad ng price control.
Kung mabibigo pa ang nabanggit na mga pagsisikap at tagubilin, sana naman ay hindi, tanging pakiusap na lamang at paglalambing na lamang, wika nga, ang nalalabi para pagaanin ng mga negosyante ang pasanin ng sambayanan, lalo na sa panahong nananalanta pa ang pandemya.