Pangako ng PH sa isang mundo na malaya sa nukleyar na armas

DAPAT na bigyang-wakas ang pagkakaroon ng nukleyar na armas sa mundo upang makatulong na maisulong ang kapayapaan, seguridad at pagkaligtas ng sangkatauhan, pahayag ni Pangulong Duterte matapos pagtibayin ng Senado ang ratipikasyon ng bansa sa global pact laban sa mga armas ng mass destruction.

Punuri ng Pangulo ang pagsang-ayon ng Senado sa ratipikasyon ng Treaty on the Prohibition of Nuclear Weapons (TPNW), na sinabing ang hakbang na ito ay nagpapakita ng pagsusulong ng bansa sa “a world free of nuclear weapons.”

“The Philippines joins hands with like-minded states in pushing for the complete prohibition of the development, possession, use and transfer of nuclear weapons,” saad ni Duterte. “The only guarantee is the total elimination of nuclear weapons from the face of the earth. The TPNW provides this guarantee,” aniya.

Sumang-ayon ang Senado sa desisyon ni Pangulong Duterte na ratipikahan ang pandaigdigang kasunduan na naghahangad na ipagbawal ang pag-develop at paggamit ng nukleyar na armas. Inaprubahan ng 23 senador ang Senate Resolution No. 60 na nagluluklok sa Pilipinas bilang ika-53 bansa na tumanggap ng nuclear ban pact.

Unang lumagda ang bansa sa legal na kasunduan upang ipagbawal ang mga armas na magdudulot nang malawakang pinsala noong 2017.

Kinikilala ng Pangulo na ang nuclear proliferation ay isang tunay na banta sa pandaigdigang seguridad. Aniya, kailangang mangako ang mga bansa na iwasan at pigilan ang anumang nukleyar na insidente lalo na sa harap ng komplikadong global security landscape.

Sa lumalagong pag-asa sa seguridad at matatag na kapaligiran, iginiit ni Duterte na nasa interes ng kapwa developed at developing na bansa ang pagtapos sa banta ng nukleyar.