Gilas draft, ilalarga ng PBA

MULING magdaraos ang PBA ng special draft para sa Gilas Pilipinas habang pinalawig hanggang Marso 5 ang deadline ng pagsusumite ng mga kinakailangang dokumento ng mga Fil-foreign applicants para sa idaraos na rookie draft.

Ito ang napagkasunduan ng board of governors sa nakaraan nilang board meeting para sa pagpaplano nila sa Season 46.

“There will be a Gilas draft this year just like last year,” pahayag ni Samahang Basketbol ng Pilipinas president at Meralco governor Al Panlilio sa isang virtual press conference kasama sina Commissioner Willie Marcial at Alaska governor Dickie Bachmann.

May record na kabuuang 97 amateur standouts ang nag-apply sa kinukunsiderang deepest draft sa nakalipas na mga taon.

Ayon kay Panlilio,pinag-aaralan na ng Gilas coaching staff ang listahan ng mga prospective draftees.

Naniniwala si Panlilio na kahit kukuha sila ng mga draftees para sa Gilas, marami pa ring makukuhang mahuhusay na players ang mga PBA teams sa talent pool sa regular draft.

Samantala, binigyan ng board ang mga Fil-foreigners ng dagdag na panahon para makapagsumite ng mga dokumentong hinihingi sa kanila mula sa Bureau of Immigration at Department of Justice.

“May nababalitaan kami na may mga Fil-Ams na nasa US, hindi makabalik dito dahil sa COVID (related travel restrictions) at sa holidays kaya nag-decide kami na i-extend sa Mar. 5,” pahayag ni Marcial.

May kabuuang 31 Fil-Ams ang nagapply sa draft ngunit 18 sa kanila ang hindi pa nakakakumpleto ng kanilang requirements.