Prayoridad sa bakuna ang health workers at elderly—WHO

HINIMOK ng World Health Organization (WHO) ang gobyerno ng Pilipinas na bigyan ng prayoridad ang mga health worker at ang matatanda (elderly) na bakunahan sa halos anim na milyong doses ng COVID-19 vaccines na matatanggap ng bansa galing sa COVAX facility.

Ipinaliwanag ni WHO country representative Rabindra Abeyasinghae, ang prayoridad o dapat unahing maturukan ay iyong health workers sapagkat sila ay laging nasa labas at nangangalaga sa mga biktima ng coronavirus.

“Sila ang health workers na patuloy inilalagay ang buhay sa panganib araw-araw dahil sa COVID-19 infected patients,” ani Abeyasinghae. Sinabi niya na ang mga bansang nag-aaplay sa bakuna ng COVID-19 ay pinakikiusapan na unahing bakunahan ang mga manggagawa sa kalusugan.

Ang pangalawang prayoridad ay iyong mga elderly o nakatatanda at mga taong may comorbidities o nagtataglay ng ibang mga sakit sa katawan. Sa Pilipinas noong una, laging sinasambit ni Pres. Rodrigo Roa Duterte na ang gusto niyang unahing bakunahan ay mga tauhan ng Armed Forces of the Philippines at Philippine National Police dahil gusto niyang sila ay malulusog sa paglaban sa COVID19 virus.

Una rito, inihayag ni National Task Force Against COVID-19 chief Carlito Galvez Jr. na may 117,000 doses ng Pfizer-BioNTech vaccines mula sa COVAX, ang nakatakdang dumating sa bansa sa buwang ito.

Samantala, ang Pilipinas ay nakatakda ring tumanggap ng 5,500,800 hanggang 9,290,400 doses ng bakuna mula sa AstraZeneca ngayon ding Pebrero. Nangangahulugan na ang bansa ay tatanggap ng kabuuang 9,407,400 doses mula sa dalawang pharmaceutical companies sa una at ikalawang quarters ng 2021.

Kung magdidilang-anghel si Acting director-general Karl Chua ng National Economic and Development Authority (NEA), may posibilidad daw na ang Metro Manila ay mailagay o sumailalim sa mas maluwag o lenient quarantine kapag ang publiko ay patuloy na nagsasagawa at sumusunod sa health protocols. Ulitin natin. Ano ba itong mga protocol sa kalusugan upang makaiwas sa bagsik ng coronavirus? Una, laging maghuhugas ng kamay, pangalawa, magsuot ng face mask at face shield kapag nasa labas, panatilihin ang tamang agwat (physical distancing), at iwasan ang pagtungo sa maraming tao at malalaking pagtitipon.

Mga kababayan at kaibigan, mahirap bang sundin ang mga ito? Kailangang tumalima tayo sa health protocols sapagkat kung magiging matigas ang mga ulo, mananatili tayong nakakulong sa bahay, walang trabaho, walang pera, walang pagkain habang ang mga mag-asawa, laluna ang mga kabataang bagong kasal, ay walang magawa kundi “maglambingan” hanggang si Misis ay lumaki ang tiyan at panibagong sanggol ang iluwal sa gitna ng pandemya!