EX-SOLON, NAPOLES, 3 PA GUILTY
Sangkot sa ‘pork’ scam
Pinakukulong ng Sandiganbayan si datong Cagayan de Oro Rep. Constantino Jaraula, businesswoman Janet Lim Napoles at tatlong iba pa dahil sa kinakaharap na graft at malversation cases kaugnay ng pagkakasangkot sa P28.8 milyong Priority Development Assistance Fund (PDAF) o pork barrel fund scam noong 2007.
Bukod kina Jaraula at Napoles, pinatawan din ng pagkakakulong sina Technology Resource Center (TRC) Group Manager Ma. Rosalinda Masongsong Lacsamana, Legislative Liaison Officer and Sales and Promotion Officer V Belina Concepcion, at private individual na si Mylene Encarnacion.
Ang mga ito ay sinintensyahan na makulong ng hanggang 10 taon sa bawat bilang ng kanilang kasong 3 counts of graft (Anti-Graft and Corrupt Practices Act) at tig-18 taon din sa 3 counts ng malversation of public funds (paglabag sa Article 217, Revised Penal Code) matapos silang mapatunayang nagkasala.
Pinagbabayad din sila bilang grupo ng aabot sa P28.8 milyon bilang civil liability sa pagkakakulong nila sa graft at P28.8 milyon pa para naman sa kanilang winaldas.
Iniutos din ng anti-graft court na hindi na sila maaaring makapagtrabaho sa pamahalaan.
Sa kaso ni Jaraula, napatunayan din itong nagkasala sa kasong 3 counts ng direct bribery at pinatawan ito ng hanggang siyam na taong pagkakapiit.
Inatasan din siyang magbayad ng P6 milyong tatlong ulit na katumbas ng tinanggap na P2 milyong rebates.
Pinawalang-sala naman sa kaso sina Department of Budget and Management (DBM) officials Rosalinda Salamida Nunez, Lalaine Narag Paule, at Marilou Dialino Bare nang hindi mapatunayan ng tagausig ang kanilang pagkakasangkot sa anomalya.
Nag-ugat ang kaso dahil sa pagendorso sa Countrywide Agri and Rural Economic Development Foundation Inc. (CARED) bilang kaagapay sa implementasyon PDAF ni Jaraula na nagkakahalaga ng P28,800,000.