Nasa isip pa lang ang bakuna
ANG pangunahing problema ng mga taga Southeast Asia ay ang banta ng COVID-19 at sa sampung bansa na na-survey kung paano nakontrol ang pandemya, ang Pilipinas ang nakakuha ng pinakamababang approval rating sa kanyang mamamayan. Sa lahat ng gobyerno ng mga estadong miyembro ng Association of Souteast Asia Nations (ASEAN), ang Pilipinas
ang kulelat sa kanyang nasisiyahang mamamayan sa pagtugon sa COVID-19, ayon sa Asean Studies Centre sa Singapore. Ang resulta ng “The State of Southeast Asia: 2021” survey ay nagpapakita na 53.7 porsyento ng mga Pilipino ang hindi sumasang-ayon at matinding hindi sumasang-ayon sa pagresponde ng administrasyong Duterte sa pandemya. Ang ibig sabihin nito, ayon sa survey, 17.9 porsyento ng mga Pilipino ang matinding hindi sumasangayon at 35.8 porsyento ang hindi sumasang-ayon sa pagtugon ng gobyerno sa pandemya. Samantala, 6 porsyento lamang ang malakas na sumasang-ayon at 19.4 porsyento ang sumasang-ayon dito. Ayon sa Asean Studies Centre, ang survey,
ikatlo ito sa magkakasunod na kanyang ginawa, ay binubuo ng mga pananaw at perspektibo ng opinion-makers, policy-makers at thought-leaders sa rehiyon na ang mga ito ay mula sa academia, business and finance, government, civil society, media at regional at international organization.
Ayon kay Presidential Spokesperson Harry Roque, hindi niya alam itong regional survey, pero ang mga local survey ay nagbigay ng mataas na rating kay Pangulong Duterte sa pagresponde niya sa COVID-10. “Ang alam ko ay ang mga survey ng Pulse Asia at sa ilang survey, 9 sa 10 ay sinusuportahan ang inisyatibo ng Pangulo. Sa isang pagaaral, 8 sa 10, iyan ang katotohanan,”
wika niya. “Hindi ito scientific survey,” wika naman ng kaalyado ng Pangulo na si Albay Rep. Joey Salceda sa regional survey. Hindi, aniya, ito sumasalamin sa sentimyento ng mga lalake at babae sa lansangan. Alin ang scientific, iyon bang survey ng Pulse Asia? Hindi nga sinasabi nito kung sino ang kanilang nakapanayam at kinuhanan ng paniniwala. Nagkakagutom-gutom na ang mamamayan. Kulang na ang supply ng pagkain. Nagtataasan na ang presyo ng mga bilihin at pangunahing serbisyo. Hindi pa sila tinantanan ng kalamidad. Ang mga mamamayang ito ay mga nasa kalye, nakapanayam ba sila ng Pulse Asia at mga iba pang survey organization na ipinagmamalaki
ni Roque na nagbigay ng mataas na rating sa Pangulo?
Ipagpalagay na natin na ang lahat ng survey ay kumikilala sa kakayahan ng Pangulo na tumugon sa pandemya, hindi nila mapapasubalian na hanggang nagyon ay wala pang kontratang nalalagdaan ang gobyerno sa mga gumagawa ng bakuna para magsupply ng kanilang produkto. Sa kabilang dako, halos lahat ng mga bansa ay pinaiiral na ang kanilang vaccination program at milyon na ng kanilang mamamayan ang nabakunahan. Hanggang ngayon ang nakikita natin na ginagawa ng mga taong gobyerno ay naghahakot na at nagdedeliber, pero walang dalang gamot pangbakuna. Nasa isip pa lang nila ito.