Pinoy sasabak sa 46 sports sa Asian Games

ISINUMITE ng Phlippine Olympic Committee (POC) sa organizers ang listahan ng mga sports na lalahukan ng Pinoy sa 19th Asian Games na gaganapin sa Hangzhou, Chìna sa Setyembre 10-25, 2022. Ayon kay POC president Abraham “Bambol” Tolentino, lalahok ang bansa sa 46 mula sa kabuuang 61 sports na nasa kalendaryo ng 19th edition ng quadrennial Games.

Kabilang sa mga sports na lalahukan ng Pilipinas ay ang aquatics, archery, athletics, baseball, softball, men’s basketball, men’s 3×3 basketball, boxing, canoe-kayak at cycling - MTB at BMX.

Sasabak din ang mga Pinoy athletes sa breaking (break dancing), men’s dragon boat, equestrian, fencing, men’s football, golf, artistic and rhythmic gymnastics, judo, jiu-jitsu, kurash, karate, bridge, chess, esports, xiangqi, modern pentathlon, skateboarding, rowing at men’s rugby.

Tatangkain din ng Pinoy na makasikwat ng medalya sa sailing, sepak takraw, shooting, sports climbing, squash, taekwondo, tennis, triathlon, men’s and women’s volleyball, men’s and women’s beach volleyball, weightlifting, wrestling at wushu.

Sinabi ni surfing chief at Asiad Chief of Mission Dr.Raul Canlas na nagsimula na ang paghahanda para sa quadrennial meet.

“We started working on the Asian Games because next year is an election year, so it’s transition year for the PSC [Philippine Sports Commission],” sambit ni Canlas. “I’m coordinating with [PSC] Chairman William Ramirez on how we are going to go about the budget right now.”

Nitong 2018 edition sa Jakarta , nakapguwi ang Pilipinas ng apat na gintong medalya --Hidilyn Diaz (weightlifting), Margielyn Didal (skateboarding), Yuka Saso (golf, women’s individual) at Saso, Bianca Pagdanganan and Lois Kaye Go (golf, women’s team).

Nakapag-uwi rin ng dalawang silver medals—Rogen Ladon (boxing) at Kiyomi Watanabe (judo) at 15 bronze medals— apat sa pencak silat, tatlo sa taekwondo, tig-dalawa sa boxing at wushu at tig-isa sa cycling, jiu-jitsu, karate at golf.