Vico Sotto, kinilala ng US bilang anticorruption champion
Kabilang si Pasig City Mayor Victor “Vico” Sotto sa listahan ng 12 indibidwal na kinilala ng administrasyon ni US President Joe Biden bilang ‘International Anticorruption Champions’ mula sa iba’t ibang panig ng mundo.
Inilarawan nito si Sotto bilang “standard-bearer” ng bagong henerasyon ng mga pulitiko na nakasentro sa anticorruption at transparency.
Sa inilabas na report na may titulong “Recognizing Anticorruption Champions Around the World” inilahad kung paanong tinalo sa eleksiyon ng 29-anyos na si Sotto, na noon ay konsehal pa lamang, ang incumbent mayor ng Pasig, na ang pamilya ay may 27 taon nang namumuno sa lungsod.
Kinilala din nito ang paglaban ni Sotto sa korapsyon at paninigurong walang kickbacks sa paggawad ng mga kontrata.
“Victor Sotto, Mayor of Pasig, The Philippines, is a standard-bearer for a new generation of Philippine politicians who prioritize anticorruption and transparency initiatives in their election campaigns and in office,” pahayag ng US State Department.
Ayon kay US Secretary of State Antony Blinken, inilunsad ang International Anticorruption Champions Award upang kilalanin ang mga indibidwal sa mundo na nagpakita ng liderato at tapang, at nagkaroon ng impact sa paglaban at paglantad sa korapsyon.
Kabilang din sa 12 indibidwal na kinilala bilang International Anticorruption Champions sina Ardian Dvorani ng Albania, Diana Salazar ng Ecuador, Sophia Pretrick ng Federated States of Micronesia, Juan Francisco Sandoval Alfaro ng Guatemala, Ibrahima Kalil Gueye ng Guinea, Anjali Bhardwaj ng India, Dhuha A. Mohammed ng Iraq, Bolot Temirov ng Kyrgyz Republic, Mustafa Abdullah Sanalla ng Libya, Francis Ben Kaifala ng Sierra Leone at Ruslan Ryaboshapka ng Ukraine.