Mosyon ni Napoles, ibinasura

Tinanggihan ng Sandiganbayan ang mosyon ng negosyanteng si Janet Lim Napoles na pigilan ang mga ebidensyang iniharap ng whistleblower na si Benhur Luy kaugnay ng kinakaharap na kasong pandarambong, kasama ang dating senador na si Juan Ponce Enrile.

Partikular na ibinasura ng antigraft court ang motion to suppress evidence na isinampa ni Napoles dahil “hindi ito tinatanggap sa anumang pag-usad ng kaso sa anumang hukuman sa alinsunod sa Section 18 ng Republic Act No. 10175 o Cybercrime Law.”

Nahaharap si Napoles sa kasong plunder at 15 graft cases kaugnay ng inilabas ni Enrile na Priority Development Assistance Fund (PDAF) para sa inindorsong bogus na nongovernment organizations na pag-aari ng nasabing negosyante.

Nakabinbin pa rin ang kaso ni Enrile na kasalukuyang nakalalaya nang magpiyansa sa pamamagitan ng “humanitarian reasons” nito.

Sa kanyang mosyon, iginiit ni Napoles na hindi tinatanggap sa hukuman ang mga ebidensiyang iniharap ni Luy, katulad ng Daily Disbursement Records, Summary of Rebates, draft endorsement letters, project listings, memorandum of agreements, at working financial plans ng kanyang tanggapan dahil bunga umano ito ng tinatawag na “poisonous tree.”

Iginiit din nito na hindi reliable witness si Luy dahil aminado umano ito na isang “kriminal” at nakuha niya ang mga dokumento sa iMac computer ng JLN Corporation sa iligal na pamamamaraan.

“Verily, it could not be said at this point that Luy had illegally accessed the files of JLN Corporation. In the same manner, to label Luy as a ‘hacker’ at this stage of the proceedings would still be premature,” ayon sa korte.

Nilinaw pa ng korte na hindi na kailangang mag-apply ng search warrant dahil isang pribadong indibwal si Luy na nagbigay sa National Bureau of Investigation (NBI) ng kanyang files at nilalaman ng hard drive nito.

“Considering that the NBI was able to access the files through the external hard drive owned by Luy, the reliance of Napoles on the exclusionary rule under Section 18 to suppress the subject evidence is misplaced,” ayon pa sa korte.