GOV’T OFFICIALS, NAGPATUROK NA
70-M, target mabakunahan
Si University of the PhilippinesPhilippine General Hospital (UP-PGH) director Dr. Gerardo ‘Gap’ Legaspi ang naging ‘first official recipient’ ng bakuna laban sa coronavirus disease 2019 (COVID-19) sa Pilipinas.
Tinanggap ni Legaspi ang bakuna ng CoronaVac, na ginawa ng Chinese firm na Sinovac Biotech, sa isang simbolikong vaccination ceremony na ginanap sa UP-PGH grounds kahapon ng umaga, at dinaluhan ng matataas na opisyal ng pamahalaan.
Ang nurse na si Chareluck Santos ang nagturok ng bakuna kay Legaspi.
“Si Dr. Legaspi ang nanguna sa atin sa laban na ito kaya karapat-dapat lang na siya ang unang tumanggap ng ating bakuna,” sinabi ni PGH spokesperson Dr. Jonas Del Rosario. “Kayong dalawa ay nasa kasaysayan na ng COVID-19,” aniya pa, na ang tinutukoy ay sina Legaspi at Santos.
Nagsagawa rin ng kahalintulad na symbolic vaccinations sa iba’t ibang pagamutan ang pamahalaan, upang palakasin ang tiwala ng mga mamamayan sa vaccination program laban sa COVID19. Kabilang rin sa mga opisyal ng pamahalaan na nakatanggap ng Sinovac shot laban sa COVID-19 ay sina Food and Drug Administration (FDA) chief Eric Domingo at testing czar Secretary Vince Dizon.
Si Domingo ay binakunahan sa PGH, kasunod ni Legaspi, habang si Dizon ay nakatanggap ng bakuna sa Tala Hospital o Dr. Jose N. Rodriguez Memorial Hospital and Sanitarium, sa Caloocan City.
Sa ilalim ng vaccination priority list ng pamahalaan, ang mga healthcare workers ang unang babakunahan, gayundin ang mga senior citizen, mga taong may comorbidities at mga uniformed personnel.
Linggo ng hapon nang dumating sa bansa ang 600,000 Sinovac doses na donasyon ng Chinese government sa bansa.
Hindi natuloy ang nakatakda sanang pagdating sa bansa nitong Lunes ng AstraZeneca vaccine.
Bukod sa PGH at Tala Hospital, ilan pa sa priority hospitals para sa vaccination ay ang Lung Center of the Philippines, Veterans Memorial Medical Center, PNP General Hospital, Pasig City General Hospital, at V. Luna Medical Center.