Metro Manila at 8 pa, mananatili sa GCQ
MANANATILI pa rin ang Metro Manila sa General Community Quarantine (CGQ) kasama ang walong iba pang lugar sa buwang ito, Marso.
Ang walong lugar na mananatili sa GCQ kasama ng Metro Manila, ayon kay presidential spokesperson Harry Roque, ay ang Apayao, Baguio City, Kalinga, Mountain Province, Batangas, Tacloban City, Iligan City, Davao City at Lanao del Sur sa buong buwan ng Marso.
Ang nalalabing mga lugar sa bansa ay ilalagay naman sa mas maluwag na antas ng quarantine, ang Modified General Community Quarantine (MGCQ).
Inirekomenda noong una ng Pandemic Task Force kay Pres. Rodrigo Roa Duterte (PRRD) na isailalim na lang ang buong Pilipinas sa MGCQ, kabilang ang Metro Manila para maibangon ang lupaypay na ekonomiya, pero ito ay tinanggihan ni Mano Digong hanggang wala pang bakuna ng COVID-19 na maituturok sa mga Pinoy.
Pangunahing layunin ni PRRD ang kaligtasan at kalusugan ng milyun-milyong mamamayan na naghihintay ng tamang bakuna. Gayunman, hindi pa lubos na batid kung kailan darating sa bansa ang mga bakuna. May 600,000 doses lang ng coronavirus mula sa China’s Sinovac Biotech Ltd. ang dumating noong Linggo.
Nagbabala ang mga eksperto at ang World Health Organization (WHO) na posibleng dumami ang bilang ng mga kaso ng COVID-19 sa Pilipinas kapag niluwagan ang mga restriksiyon, gaya ng paglalagay sa bansa sa MGCQ mula sa GCQ.
Ang Pilipinas ay nakapagtatala ng average na 1,6000 bagong COVID19 cases bawat araw sapul noong Nobyembre at nahaharap sa bago, at higit na nakakahawang variants ng coronavirus. Noong Pebrero 26, nakapagtala ang DOH ng 2,600 kaso ng Covid-19, pinakamarami sa nakaraang ilang buwan.
Samantala, kinumpirma ng mga pinuno ng kalusugan ang pagkakatuklas sa dalawang mutations ng virus ng COVID-19, subalit hindi pa batid ang mga implikasyon nito sa kalusugan ng mga tao.
Ayon sa mga ulat, ang Pilipinas ang pangalawa sa pinakagrabeng tinamaan ng COVID-10 sa Southeast Asia, sa pagkakaroon ng mahigit sa 570,000 kaso at mahigit sa 12,000 kamatayan.
Maaaring dumami pa ito kapag niluwagan daw ang mga restriksiyon at naging pabaya ang mga Pinoy sa pagtalima sa mga protocol na: Laging maghugas ng kamay, magsuot ng face mask/face shield, panatilihin ang tamang agwat (physical distancing), at umiwas sa maraming tao at malalaking pagtitipon.