Is 1:10, 16-20 • Slm 50
Noong panahong iyon, sinabi ni Hesus sa mga tao at sa kanyang mga alagad, “Ang mga eskriba at ang mga Pariseo ang kinikilalang tagapagpaliwanag ng Kautusan ni Moises. Kaya’t gawin ninyo ang itinuturo nila at sundin ang kanilang iniuutos. Ngunit huwag ninyong tularan ang kanilang gawa, sapagkat hindi nila isinasagawa ang kanilang ipinangangaral. Nagbibigkis sila ng mabibigat na dalahin at ipinapasan sa mga tao; ngunit ni daliri ay ayaw nilang igalaw upang tumulong sa pagdadala ng mga iyon. Pawang pakitang-tao ang kanilang mga gawa. Nilalaparan nila ang kanilang mga pilakterya at hinahabaan ang palawit sa laylayan ng kanilang mga damit. Ang ibig nila’y ang mga upuang pandangal sa mga piging at ang mga tanging luklukan sa mga sinagoga. Ang ibig nila’y pagpugayan sila sa mga liwasang bayan, at tawaging guro.
PAGSASADIWA:
“Ang pinakadakila sa inyo ay dapat maging lingkod ninyo.”—Naging mariin ang ating Panginoong Hesus sa ating ebanghelyo sa kanyang pagtuligsa sa mga Pariseo at mga eskriba. Binigyan diin ni Hesus ang kahalagahan ng pagpapakumbaba sa pananampalataya sa Diyos at pakikipag-ugnayan sa kapwa-tao.
Maaaring napakasarap sa pakiramdam ng mga Pariseo na iginagalang sila ng ibang tao dahil sa kanilang katayuan sa lipunan habang tinatakasan ang kanilang responsibilidad. Ipinapaalala sa atin ng ating Panginoong Hesus na habang tumataas ang ating katayuan sa buhay mas magkakaroon tayo ng tungkuling na maglingkod at magpakumbaba. Kung nagiging higit na ang pagpapahalaga natin sa ating katayuan at posisyon sa lipunan kaysa sa hangaring maglingkod, ito ang simula ng pagkawala ng kredibilidad sa ating ginagawa at sinasabi.